Урумчи шаҳрида биринчи Ўзбекистон-Хитой минтақалараро форуми бўлиб ўтди

Форумда Ўзбекистон делегациясига Ўзбекистон Республикаси Бош вазирининг ўринбосари Жамшид Ходжаев, Хитой делегациясига эса ХКП Марказий Қўмитаси Сиёсий бюроси аъзоси, Шинжон-Уйғур автоном тумани Партия қўмитаси котиби Ма Синруй бошчилик қилди.

Делегациялар раҳбарлари қутлов сўзи билан чиқишлар экан, мамлакатларимиз ўртасидаги икки томонлама муносабатлар ўзаро ҳамкорликнинг сифат жиҳатидан янги босқичига қадам қўйгани икки давлат раҳбарларининг оқилона, ​​узоқни кўзлаб олиб бораётган сиёсати туфайли эришилганини таъкидладилар. Кўп қиррали ҳамкорликнинг деярли барча йўналишларида сезиларли ютуқларга эришилди, томонлар бир-бирини ишончли ва вақт синовидан ўтган ҳар томонлама стратегик шериклар сифатида қабул қилмоқда.

Савдо ва сармоявий шерикликнинг ижобий динамикаси қайд этилди. Охирги олти йилда товар айирбошлаш ҳажми икки баробар ошиб, 14 млрд. доллардан ошди. Бу кўрсаткични яқин йилларда 20 млрд. долларга етказиш учун барча зарур имкониятлар мавжудлиги таъкидланди. Хитойдан ўзлаштирилган инвестициялар ҳажми қарийб 15 млрд. долларни ташкил этди. Ўзбекистонда Хитой капитали иштирокидаги 2 мингдан ортиқ корхона муваффақиятли фаолият юритмоқда. 2023 йилда Хитой компаниялари иштирокида умумий қиймати қарийб 2 млрд. долларлик 60 дан ортиқ лойиҳа муваффақиятли амалга оширилди. Хитой компаниялари мамлакат саноат соҳасини модернизация қилишда етакчи ҳамкорларга айланмоқда.

Иштирокчилар эътибори Ўзбекистонда инвестиция муҳитини яхшилаш, инвестиция лойиҳаларини амалга ошириш учун ҳар томонлама қулай шарт-шароитлар яратиш борасида амалга оширилаётган ислоҳотларга қаратилди. Хусусан, бир қатор рухсатнома ва лицензиялар бекор қилинди, хусусий мулк дахлсизлиги ва инвесторлар ҳуқуқларини ҳимоя қилиш чоралари кўрилди, хорижий инвесторлар ўз акцияларидан олинган дивидендлар бўйича уч йил муддатга солиқ тўлашдан озод этилди, 7 (етти) мингдан ортиқ номдаги хомашё ва товарлар учун божхона тўловлари бекор қилинди, йирик банклар, саноат ва инфратузилма объектларини хусусийлаштириш Дастури ишга туширилди, юқори технологияли маҳсулотлар ишлаб чиқариш доирасидаги лойиҳаларни молиялаштириш учун 1 млрд. долларлик капиталга эга Саноатни ривожлантириш жамғармаси ташкил этилди. “Саноат ипотекаси” жорий этилди. Натижада кейинги олти йилда ялпи ички маҳсулот ҳажми бир ярим баробардан, корхоналар сони икки баробар, саноат ўсиши 40 фоиздан ошди. 2023 йилда мамлакатга 22 млрд. доллар тўғридан-тўғри хорижий инвестициялар жалб этилди.

Ҳудудлар ва ишбилармон доиралар вакилларининг бевосита ўзаро ҳамкорлигини ошириш орқали  икки мамлакат ўртасидаги муносабатларни кенгайтиришнинг кейинги қадамлари ва истиқболли йўналишлари белгилаб олинди. Шу нуқтаи назардан, уларни қўшма ташаббусларни амалга оширишга жалб этиш, Ўзбекистон вилоятлари ва Хитой провинцияларининг саноат ва қишлоқ хўжалиги салоҳияти кўргазмаларини мунтазам ўтказиш механизмини йўлга қўйиш, шунингдек, ҳамкорликда эришилган келишувлар амалга оширилишини доимий равишда мониторинг қилиб бориш муҳим аҳамиятга эга эканлиги таъкидланди.

Делегациялар раҳбарлари ишбилармон доиралар раҳбарларини мамлакатларимиз иқтисодиётининг рақобатбардош афзалликлари асосида юқори технологияли ишлаб чиқаришларни яратиш, талабга жавоб берувчи маҳсулотлар ишлаб чиқариш ва янги бозорларни биргаликда ўзлаштириш бўйича саноат кооперациясини ривожлантириш ва ҳамкорликда ишлаб чиқариш ҳажмини ошириш бўйича саъй-ҳаракатларни кучайтиришга, шунингдек, ўзаро савдо алоқалари ҳажмини оширишга чақирди.

Форум “B2B” вa “B2G” музокаралари сессияси билан давом этди, унда икки мамлакат компаниялари раҳбарлари тафсилотларни муҳокама қилишди ва иқтисодиётнинг турли соҳаларида ўзаро манфаатли янги шартнома ва битимлар тузишга муваффақ бўлишди.

Форум якуни бўйича Ўзбекистоннинг барча ҳудудлари ва Хитойнинг тегишли провинциялари ўртасида мустаҳкам иқтисодий, савдо ва маданий алоқаларни ўрнатишга оид 27 та ҳужжат имзоланди. Бундан ташқари, икки мамлакат ишбилармон доиралари ўртасида 30 та битим ва шартномалар имзоланди.

Минтақалараро форум доирасида яна бир муҳим воқеа, яъни Шинжон-Уйғур автоном тумани “Xinjiang International Convention & Exhibition Centre” марказида “Маdе in Uzbekistan” Ўзбекистон маҳсулотлари кўргазмасининг очилиши ҳам бўлиб ўтди.

Умумий майдони 2 880 кв. метр бўлган 14 та стендда электротехника, фармацевтика, тўқимачилик ва ипакчилик саноати, чарм-пойабзал маҳсулотлари, озиқ-овқат маҳсулотлари, маиший кимё маҳсулотлари, ҳунармандчилик, қурилиш материаллари, мебель ва аксессуарлар намойиш этилмоқда.

Мультимедиа экранларида ҳудудларнинг иқтисодий салоҳияти билан биргаликда амалга оширишга тайёр бўлган истиқболли инвестиция лойиҳалари тадбир меҳмонларига тақдим этилди.