.UZ миллий доменининг 30 йиллигига бағишланган халқаро конференция бўлиб ўтди

Тадбир глобал интернет ресурсларини бошқарувчи етакчи ташкилотлар, техник ҳамжамиятлар, давлат идоралари, бизнес вакиллари ва домен номлари регистраторларини бирлаштирди.

 Тадбирда Рақамли технологиялар вазири Шерзод Шерматов иштирок этди.

 Тадбир мамлакат ва минтақанинг рақамли экотизими учун муҳим воқеа бўлиб, қуйидаги нуфузли ташкилотларни бир жойга тўплади:

– ICANN (Домен номлари ва IP-манзилларни бошқариш корпорацияси),

– RIPE NCC (Европа, Яқин Шарқ ва Марказий Осиё қисмини қамраб олган минтақавий интернет регистри),

– APTLD (Осиё-Тинч океани юқори даражадаги доменлар регистрлари ташкилоти),

– UNESCO ҳамда .AZ (Озарбайжон), .AM (Арманистон), .BY (Беларус), .IN (Ҳиндистон), .KG (Қирғизистон), .KZ (Қозоғистон), .RU/.РФ (Россия) каби йирик миллий домен регистрлари вакиллари.

Бу даражадаги кўп томонлама иштирок рақамли технологиялар соҳасида халқаро ҳамкорликни мустаҳкамлабгина қолмай, балки глобал ҳамжамият учун хавфсиз, инклюзив ва барқарор интернет яратишга муносиб ҳисса қўшади.

Конференцияда .UZ миллий домен зонасида IPv6 протоколини жорий қилиш ҳақида эълон қилинди. Бу тармоқ инфратузилмасини модернизация қилиш йўлида муҳим қадамдир.

Конференциянинг яна бир муҳим натижаси KazNIC (.KZ) ва UZINFOCOM (.UZ) ўртасида ўзаро ҳамкорлик меморандуми имзоланиши бўлди. Ушбу ҳужжат домен зоналари бошқаруви ва интернет инфратузилмаси соҳасида билим алмашинуви ва қўшма ташаббусларни амалга оширишни кўзда тутади.

Конференция қуйидаги долзарб йўналишларни ёритган сессияларни ўз ичига олди:

– “Интернет: эртанги кун сари” — интернет ва технологияларнинг жамият ва иқтисодиётдаги ўрни, келажакдаги рақамли чақириқлар ва имкониятлар.

–  “Техник сессия” — DNS бошқаруви, янги протоколлар, хавфсизлик ва домен инфратузилмаси барқарорлиги ҳақида техник муҳокамалар.

–  “Рақамли маконда маркетинг” — доменлар, ҳостинг ва интернет хизматларини илгари суриш стратегиялари ва амалиётлари.

–  “Технологик чегара” — домен ауктсионлари, AI, blockchain ва NFT технологиялари асосида янги имкониятлар ва ечимлар.

Конференция Ўзбекистоннинг глобал рақамли ҳамкорликка очиқлигини намоён этди. IPv6ни ишга тушириш, халқаро алоқаларни мустаҳкамлаш ва илғор технологияларни илгари суриш .UZ домен зонасининг етуклигини ва глобал интернет ривожига қўшаётган ҳиссасини яна бир бор тасдиқлади.