Жаҳон банкининг операциялар бўйича бошқарувчи директори Анна Берде билан учрашув бўлиб ўтди

Учрашувда Жаҳон банкининг Европа ва Марказий Осиё бўйича вице-президенти Антонелла Бассани, Халқаро молия корпорациясининг Марказий Осиё ва Туркия бўйича минтақавий директори Вебке Шломер ҳамда Ўзбекистон Республикаси Марказий банки раиси Тимур Иштемов ва бошқа масъул вакиллар иштирок этди.

Учрашув аввалида томонлар глобал иқтисодий тенденциялар, иқтисодий ўсиш барқарорлигини таъминлаш, замонавий трендлар ва имкониятлар, меҳнат самарадорлигини оширишда сунъий интеллектнинг ўрни ва таъсири, иш ўринларини яратиш, илғор технологияларни жалб қилиш ҳамда савдо имкониятларини кенгайтиришда Жаҳон Савдо Ташкилотининг аҳамияти юзасидан фикр алмашди.

Шу билан бирга, янги иш ўринларини яратиш, жумладан, инфратузилма, соғлиқни сақлаш, туризм, қишлоқ хўжалиги ва саноат ишлаб чиқариши соҳаларида сифатли иш ўринларини яратиш айни пайтдаги муҳим йўналишлардан эканлиги таъкидлаб ўтилди.

Шунингдек, муҳокамалар давомида томонлар мамлакатимизда амалга оширилаётган ижтимоий-иқтисодий ислоҳотлар юзасидан эришилган натижалар ҳамда Ўзбекистондаги иқтисодий-молиявий жараёнлар юзасидан муҳокамалар олиб борди. Хусусан, қуйидаги йўналишларга алоҳида тўхталиб ўтилди:

• макроиқтисодий барқарорликни таъминлаш:
• самарали буджет сиёсатини юритиш:
• инфлация даражаси мақсадли кўрсаткичларда бошқариш:
• давлат-хусусий шериклик асосида амалга оширилаётган инфратузилма лойиҳалари юзасидан этришилаётган натижалар:
• давлат иштирокидаги корхоналарни трансформация қилиш юзасидан олиб борилаётган ишлар:
• хусусийлаштириш жараёнлари:
• энергия самарадорликни ошириш ҳамда барқарор ва яшил иссиқлик тизимини шакллантириш:
• хусусий секторни қўллаб-қувватлаш:
• транспорт-логистика соҳасини ривожлантириш.

Ўз навбатида, Жаҳон банки вакиллари Ўзбекистонда иқтисодий ўсиш ҳамда макроиқтисодий барқарорликни таъминлаш юзасидан амалга оширилаётган ишларни юқори баҳолади.

Музокаралар якунида томонлар ўзаро ҳамкорлик алоқаларини янада ривожлантириш, юқоридаги қайд этилган соҳалар юзасидан фикрлар алмашинув жараёнларини кенгайтириш ҳамда белгиланган мақсадларга эришишда самарали ва тизимли фаолият олиб боришга келишиб олди.