Жаҳон банки билан экология ва барқарор ривожланиш соҳасидаги ҳамкорлик мустаҳкамланади

Учрашувда томонлар ирригация, ландшафтларни тиклаш ва ҳаво ифлосланишини назорат қилиш соҳаларига сармоя киритиш борасида икки томонлама ҳамкорликни мустаҳкамлаш масаласини муҳокама қилдилар. Шунингдек, Марказий Осиёда ер деградацияси, чўлланиш ва иқлим ўзгаришига қарши курашга қаратилган RESILAND лойиҳасига ҳам алоҳида эътибор қаратилди. Мазкур лойиҳа Жаҳон банкининг минтақа экотизимларини барқарор ривожлантириш ва муҳофаза қилиш стратегияси доирасида амалга оширилмоқда.

Бундан ташқари, давлатимиз раҳбарининг 2025 йилни “Атроф- асраш ва "яшил иқтисодиёт" йили” деб эълон қилиш ташаббуси хорижий томонга тақдим этилди. Жорий йил дастурига қуйидагилар киради: Самарқанд иқлим форуми (4–5 апрель), “Eco Expo” халқаро экологик технологиялар кўргазмаси (3–5 июнь) ва Йўқолиб кетиш хавфи остида турган ёввойи фауна ва флора турлари билан халқаро савдо тўғрисидаги конвенция иштирокчиларининг 20-конференцияси (CITES COP20 24 ноябрь — 5 декабрь).

С.Вахба вазирга Жаҳон банкининг “Тошкент шаҳрида ҳаво сифатини баҳолаш” ва вазирлик мутахассислари билан ҳамкорликда ишлаб чиқилган “Ўзбекистонда ҳаво сифатини бошқаришни такомиллаштириш бўйича йўл харитаси” ҳисоботларини тақдим этди. Жаҳон банки, шунингдек, ҳаво сифатини мониторинг қилиш ва яхшилаш борасида ҳамкорликни кучайтиришни таклиф қилди.

Учрашув якунида томонлар бузилган ландшафтларни тиклаш, экотуризмни ривожлантириш ва маҳаллий ҳамжамиятни қўллаб-қувватлашга қаратилган қўшма лойиҳалар муваффақиятли амалга оширилишига умид билдирди. Атмосфера ҳавоси мониторинги ва атроф-муҳитни муҳофаза қилиш соҳасида ҳамкорликни янада ривожлантириш бўйича келишувга эришилди.