Ўзбекистон ва Туркия ўртасида туризм соҳасида ҳамкорлик меморандуми имзоланди

Ҳужжатларга Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов ҳамда Туркия Республикаси Маданият ва туризм вазири Меҳмет Нури Эрсой имзо чекишди.

Учрашувда Азиз Абдуҳакимов охирги йилларда икки давлат раҳбарлари ташаббуси билан туризм соҳасида катта ютуқларга эришилаётганлигини, сайёҳлар оқими йилдан-йилга ортиб бораётганлигини таъкидлади. 

Маълумот учун, Ўзбекистонга туризм мақсадида келган Туркия фуқаролари сони 2018 йилда 41 299, 2019 йилда 63 539, 2021 йилда 44 168, 2022 йилда 75 559, 2023 йилда 106 516, 2024 йил 149 146 нафарни ташкил қилди. Туркияга келган Ўзбекистон фуқаролари сони эса 2021 йилда 170 636, 2022 йилда 305 831, 2023 йилда 187 749, 2024 йилда 229 968 нафарга тенг бўлди. Ўз навбатида авиарейслар қамрови ва оқими ҳам кескин ўсди. Бугунги кунда ҳафтасига 106 та авиарейс йўлга қўйилган (2023 йилда бу кўрсатгич 62 та, 2022 йилда – 20 та, 2021 йилда 10 та рейсни ташкил қилган). 

Учрашувда икки томонлама ҳамкорликни янада кенгайтириш муҳим эканлиги таъкидланди. 

“Биз бугунги мавжуд йўналишларни кенгайтирган ҳолда Ўзбекистоннинг туризм масканларини Туркиянинг йирик туризм марказлари — Измир, Mugla, Fethie, Аlaniya, Аdana, Bursa кабилар билан лоукостерларни жалб қилган ҳолда ўзаро боғламоқчимиз. Имкониятларни тўлиқ ишга солиш учун авиарейсларни 3 баравар ошириш зарур, — деди А.Абдуҳакимов. — Шунингдек, ҳар бир томонга камида бир миллион нафардан туристларни олиб келишни кўзда тутадиган “Миллион+миллион” дастурини ишга туширишни таклиф қиламиз”.

Учрашувда қуйидаги таклифлар илгари сурилди: 

— Туризм масканларини боғлайдиган авиақатновларни кўпайтириш; 
— Ўзбекистонда Туркиянинг ва Туркияда Ўзбекистоннинг туризм салоҳиятини янада кенгроқ тарғиб қилиш; 
— Мотуридий, Нақшбандий ва Бухорий тариқатлари издошларининг Туркия марказий ва шарқий провинцияларида истиқомат қиладиган йирик жамоаларини (умумий 3 млн атрофида) Ўзбекистонга кенгроқ жалб этиш, музейлар ўртасида ҳамкорликни кенгайтириш, маданий тадбирларни кўпайтириш; 
— “Турк қардошлар” дастурини амалга ошириш, давлатларимиз тарихини ўзаро чуқурроқ ўрганиш, ҳамкорликда кино асарлари яратиш; 
— Ўзбекистонда жадал ривожланиб бораётган туризм йўналишлари – экотуризм, экстремал туризм, зиёрат туризмига бағишланган тематик кўргазмалар, фото-кўргазмалар ташкил қилиш; 
— Туркиялик сайёҳларнинг Бухородаги 7 та Пир зиёратгоҳларига саёҳатларини йўлга қўйиш;
— Туркия музейларида Ўзбекистон музей экспонатлари бурчакларини яратиш; 
— Туркиянинг йирик санъат даргоҳлари, парк ва боғларида Ўзбекистон томонидан ЮНЕСКО номоддий маданий мерос рўйхатига киритилган бахшичилик, мақом санъати ва лазги рақси намойишлари, маданий фестиваллар ва “опен-аир” тадбирларини ўтказиш;
— туркияликлар учун, уларнинг талаб ва истакларига мос туристик маҳсулотлар яратиш мақсадида туроператорлар, рестораторлар, туризм инфраструктурасига сармоя киритадиган компанияларни Ўзбекистонга жалб қилиш;
— аэропортларда, меҳмонхона, кафе ва ресторанларда турк тилида кўрсаткич белгиларини ўрнатиш, менюлар яратиш, турк туристларига мослаштирилган (tailor-made) маршрут, экскурсия ва турлар ҳамда давлатлар кулинариясини бирлаштирган ресторанлар ташкил қилиш; 
— Туризмнинг турли соҳалари бўйича ўзаро тажриба алмашиш.

Ўз навбатида Меҳмет Нури Эрсой Ўзбекистон томонидан билдирилган барча ташаббусларни қўллаб-қувватланишини билдирди.

“Ўзбекистон тарихий ва маданий бойликлари билан дунёдаги энг муҳим сайёҳлик йўналишларидан бири ҳисобланади. Самарқанд, Бухоро ва Хива каби бетакрор шаҳарлар нафақат Марказий Осиё, балки бутун дунё маданий меросида муҳим ўрин тутади. Бундан ташқари, ўзбек таомлари, анъанавий ҳунармандчилик ва меҳмондўстлик каби ноёб тажрибалар Ўзбекистоннинг туризм соҳасидаги жозибадорлигини янада оширмоқда”, — деди Меҳмет Нури Эрсой.

Маълумот учун, Ўзбекистонда Туркия билан ҳамкорликда 12 та меҳмонхона ва туристик объектлар мавжуд (“International”, “Wyndham”, “Intercontinental”, “Calik Energy”, “Piramit Tower”, “Sarikoc Holding” ва бошқалар. Шунингдек, юртимизда туркиялик ҳамкорлар билан биргаликда 100 дан ортиқ ресторанлар ташкил қилинган.

2025-2026 йилларда эса турк сармояси кўмагида Бухоро, Самарқанд, Жиззах, Фарғона ва Тошкент вилоятларида умумий 167,9 млн долларлик 11 та меҳмонхона лойиҳаларини амалга ошириш режалаштирилган.