Ал-Қувайтда бўлиб ўтган форум ҳамкорликнинг янги йўналишларини белгилаб берди

Тадбирда икки давлатнинг тегишли вазирлик ва идоралари, тармоқ бирлашмалари раҳбарлари ҳамда 100 дан кўпроқ йирик компания ва молия институтлари раҳбарлари иштирок этди.

Форумда делегацияларга Ўзбекистон томонидан – Ўзбекистон Республикаси инвестициялар, саноат ва савдо вазири Лазиз Кудратов, Қувайт томонидан – Қувайт Савдо-саноат палатаси раҳбари Рабаҳ ал-Рабаҳ бошчилик қилди.

Форумнинг очилиш маросимида қутлов сўзи билан сўзга чиққан Лазиз Кудратов сўнгги йилларда Ўзбекистон билан Қувайт ўртасидаги муносабатлар изчил ривожланиб бораётганини алоҳида таъкидлади. Йирик қувайтлик компаниялар Ўзбекистонда соғлиқни сақлаш, қишлоқ хўжалиги, инфратузилма, меҳмонхона бизнеси, фармацевтика ва кўчмас мулк соҳаларида лойиҳаларни муваффақиятли амалга оширмоқда.

Мамлакатимизда хорижий инвесторлар учун энг қулай шароитлар яратилганлиги таъкидланди. Хусусан, имтиёзлар ва преференциялар жорий этилди, тадбиркорлар дуч келаётган тўсиқлар олиб ташланмоқда, хусусийлаштириш дастури амалга оширилмоқда, инфратузилмаси ривожланган ўнлаб ЭИЗлар ташкил қилинди, МДҲ ва Европа Иттифоқи бозорларига божсиз кириш таъминланди.

Натижада сўнгги йилларда Ўзбекистон иқтисодиёти қарийб икки баравар ошди. Биргина 2024 йилда ЯИМ 6,5 фоизга ўсиб, 115 миллиард долларга етди. Хорижий инвестициялар ҳажми 1,6 баробар кўпайиб, 34,9 миллиард долларни ташкил этди.

“Ўзбекистон – 2030” стратегияси амалга оширилмоқда. Унинг доирасидаги вазифалар кенг кўламли ислоҳотлар билан биргаликда 2030 йилга бориб Ўзбекистон ялпи ички маҳсулотини 200 миллиард долларга етказиш, даромади ўртачадан юқори бўлган, йилига 110 миллиард доллар тўғридан-тўғри хорижий инвестициялар ва 45 миллиард долларлик экспортга эга мамлакат мақомига эришиш имконини беради.

Шу билан бирга, икки давлат ўртасидаги савдо-иқтисодий, сармоявий ва саноат соҳасидаги ҳамкорликни чуқурлаштириш бўйича фойдаланилмаётган улкан салоҳиятга эътибор қаратилди.

Шу ўринда, агросаноат тармоғи, тўқимачилик саноати, тоғ-кон саноати, энергетика ва нефт-кимё, соғлиқни сақлаш ва фармацевтика, хусусийлаштириш, логистика, алоқа ва туризм каби ҳамкорликни янада ривожлантиришнинг устувор йўналишлари санаб ўтилди.

Ўз навбатида, Қувайт Савдо-саноат палатаси раҳбари Рабаҳ ал-Рабаҳ Ўзбекистоннинг икки томонлама савдо-иқтисодий ва сармоявий ҳамкорликни ривожлантириш учун шарт-шароитлар яратиш борасидаги саъй-ҳаракатларини юқори баҳолади ҳамда Қувайт ва Ўзбекистон тадбиркорларини ҳамкорликни чуқурлаштиришга чақирди, уларни томонларнинг янги лойиҳалар ва ташаббусларни қўллаб-қувватлашга ўзаро тайёр эканига ишонтирди.

Бизнес-форум доирасида “B2B” вa “G2B” музокаралари ва миллий маҳсулотлар кўргазмаси ташкил этилди. Тадбиркорлар янги алоқаларни ўрнатиш, қўшма лойиҳаларнинг муҳим жиҳатлари ва товарларни ўзаро етказиб бериш масалаларини муҳокама қилиш имконига эга бўлди.

Шунингдек, форум доирасида миллий маҳсулотлари кўргазмаси ташкил этилиб, унда тадбиркорлар ташқи бозорда талаб юқори бўлган маҳсулотларни намойиш этди.

Тадбир якунлари бўйича қатор инвестициявий битимлар ва савдо шартномалари имзоланди. Бизнес доиралари вакилларига кўра, имзоланган ҳужжатлар қисқа вақт ичида Ўзбекистон-Қувайт алоқаларини сезиларли даражада кенгайтириш ва икки давлат ўртасидаги товар айирбошлаш ҳажмини ошириш имконини беради.