Олий таълим, фан ва инновациялар вазири халқаро маслаҳатчилар кенгаши делегацияси билан учрашди

Дастлаб, вазир Европанинг етакчи олий таълим муассасалари тажрибаси, шунингдек, кредит-модуль тизимини Ўзбекистон олий таълим соҳасига жорий этиш ва таълим-ишлаб чиқариш ўртасидаги интеграцияни таъминлашда кўрсатган ёрдами учун халқаро маслаҳатчилар Алфред Гузенбауэр, Александр Квасневский ва Штефан Фюлеларга миннатдорлик билдирди.

Учрашув давомида 2025-2026 ўқув йилидан Германиянинг “Anhalt” университети томонидан Ўзбекистонда учта янги бакалавриат дастурини жорий этиш, Erasmus+ дастури доирасида профессор-ўқитувчилар ва олимлар учун семинар-тренинглар ташкил этиш, Тошкент, Нукус ва Навоий шаҳарларида Европа университетлари билан ҳамкорлик бўйича форумлар ўтказиш масалаларини муҳокама қилдилар.

Шунингдек, келгусида Европа университетлари билан қўшма таълим дастурларини кенгайтириш, илмий ҳамкорлик ва академик алмашинувларни ривожлантириш, талабалар ва профессор-ўқитувчилар учун малака ошириш ҳамда тадқиқот лойиҳаларини кенгайтириш масалалари кўриб чиқилди.

Анжуман якунида узлуксиз касбий ривожланиш ва таълим дастурларини қўллаб-қувватлаш бўйича ишларни янада жадаллаштириш юзасидан фикр алмашилди.