Венгриянинг юртимиздаги элчиси билан IT хизматлар экспорти, IT таълим йўналишларида ўрганиш лозим бўлган тажрибалар ҳақида суҳбатлашилди

Учрашувда дастлаб Ўзбекистонда рақамли технологиялар соҳасида амалга оширилаётган ишлар ва яратилган шароитларга бағишланган видео тақдимот ўтказилди.

Рақамли технологиялар вазири Ўзбекистонни денгизга чиқиш имкониятлари чеклангани, шунингдек, аҳоли сонининг тезлик билан ўсаётганини ҳисобга олиб, мамлакатда рақамлаштириш ва бу орқали масофадан туриб ишлаш – IT хизматлар экспортини ривожлантиришга катта эътибор қаратилаётганини таъкидлади.

Шу мақсадда ёшларни юқори маошли ишларга жалб қилиш, жумладан, БПО хизматлар экспортини ривожлантириш ва ошириш асосий йўналишлардан эканини қайд этди. Вазир бу йўналишда ишлаш учун катта талаблар мавжуд эмаслигини, фақат инглиз тилини ёки бошқа чет тилларини етарли даражада билиш етарли эканини айтиб ўтди.

Шу билан бирга, вазир ёш авлоднинг инглиз тилини билиш даражаси ҳам юқорилаб бораётгани ва тез суратларда ўсаётгани, шу мақсадда уларни яхши маошли ишларга жойлаштиришда IT хизматлар соҳаси айни имконият бўлаётганини таъкидлади.

Ўз навбатида, Венгрия элчиси мамлакатда IT йўналишда амалга оширилаётган тизимли ишларни юқори баҳолади.

Шунингдек, Европа мамлакатлари, жумладан, Венгрия давлати билан ҳамкорликда IT хизматлар экспорти, IT таълим йўналишларида ўрганиш лозим бўлган тажрибалар ҳақида суҳбатлашилди.