Учрашувда Соғлиқни сақлаш соҳасидаги турк эркспертлари Меҳмет Угурлу, Муҳаммет Еркен, Меҳмет Авжи, Талгат Кучук, Меҳмет Эрсой ва Ҳасан Багжи ҳамда Ўзбекистон Республикаси Соғлиқни сақлаш вазири Асилбек Худаяров, Иқтисодиёт ва молия вазири ўринбосари Отабек Фозилкаримов ва бошқа масъул вакиллар иштирок этди.

Муҳокамалар давомида томонлар Ўзбекистонда соғлиқни сақлаш тизимини жаҳоннинг илғор ва муваффақиятли тажрибалар асосида такомиллаштириш, хусусан, бирламчи тиббий-санитария ёрдамини ислоҳ қилиш, соғлиқни сақлаш соҳасини рақамлаштириш, тиббий суғурта тизими, фармацевтика соҳаси ва шошилинч тиббий ёрдам кўрсатишни ривожлантириш масалаларини муҳокама қилди.

Шунингдек, учрашувда шифохоналарнинг фаолият самарадорлигини оширган ҳолда кўрсатиладиган тиббий хизматлар сифатини яхшилаш, тиббий хизматларни режалаштириш, шифокорлар малакасини ошириш ҳамда ушбу йўналишда самарали механизмларни шакллантиришга алоҳида тўхталиб ўтилди.

Музокаралар якунида томонлар ўзаро ҳамкорлик алоқаларини ривожлантириш ҳамда соғлиқни сақлаш тизимини ривожлантиришда фикрлар алмашинуви жараёнларини янада кўпайтиришга келишиб олдилар.