Тошкент вилояти ҳокими Беларусь Республикаси Кенгаши Раиси билан учрашди

Юқори даражадаги учрашувда Ўзбекистон ва Беларусь ўртасидаги дўстона муносабатларни янада мустаҳкамлаш, минтақалараро ҳамкорликни ривожлантириш, савдо-иқтисодий алоқаларни кенгайтириш ҳамда гуманитар соҳадаги ҳамкорликнинг истиқболли йўналишлари муҳокама қилинди.

Томонлар икки мамлакат ҳудудлари ўртасидаги ўзаро манфаатли ҳамкорликни изчил ривожлантириш, мавжуд имкониятлардан самарали фойдаланиш ва аниқ амалий лойиҳаларни илгари суриш масалаларига эътибор қаратдилар.
Мезбонлар Тошкент вилояти Беларусь учун ишончли ҳамкор ҳисобланишини мамнуният билан қайд этдилар. Айни пайтда амалга оширилаётган қўшма лойиҳалар ҳажми қарийб 55 миллион АҚШ долларини ташкил этади.

Тошкент вилояти делегациясининг бу галги ташрифи доирасида Беларусь заминида йирик истиқболли лойиҳа — 10 минг бош қорамолга мўлжалланган чорвачилик мажмуаси барпо этилмоқда. Лойиҳа доирасида кейинчалик маҳсулотларни чуқур қайта ишлаш кўзда тутилган.

Бундан ташқари, томонлар озиқ-овқат хавфсизлигини мустаҳкамлаш бўйича қўшма дастурларни ҳам батафсил муҳокама қилдилар.

Қайд этилганидек, минтақалараро мулоқот савдо-иқтисодий алоқаларни мустаҳкамлаш, янги ҳамкорлик йўналишларини йўлга қўйиш ҳамда халқлар ўртасидаги дўстлик ва ўзаро ишончни янада мустаҳкамлашда муҳим аҳамият касб этади.

Учрашув Беларусь ва Ўзбекистон ҳудудлари ўртасидаги ҳамкорликни янги босқичга олиб чиқиш, ўзаро манфаатли ташаббусларни амалга ошириш ва узоқ муддатли шериклик алоқаларини кенгайтириш учун муҳим мулоқот майдони бўлиб хизмат қилади.