Тошкентда IX Халқаро ECOSA уруғчилик конгресси бўлиб ўтмоқда

Конгрессда Ўзбекистон Республикаси Қишлоқ хўжалиги вазири Иброҳим Абдураҳмонов нутқ сўзлаб, уруғчиликнинг аграр тармоқ тараққиёти, ҳосилдорлик ва озиқ-овқат хавфсизлигини таъминлашдаги стратегик аҳамиятига алоҳида тўхталди.

Таъкидланганидек, қишлоқ хўжалигининг пойдевори – сифатли уруғ. Чунки мўл ҳосилга эришиш, фермер ва деҳқонларнинг меҳнати самарадорлигини ошириш, ишлаб чиқаришдан кўзланган натижаларни таъминлаш, энг аввало, экилаётган уруғнинг сифати ва салоҳиятига боғлиқ.

Бугун эса бу борада янги ёндашувлар, замонавий илмий ечимлар ва инновацион ишланмалар тобора муҳим аҳамият касб этмоқда.

Кеча муайян ҳудуд шароитида юқори самара берган нав бугунги шароитда кутилган натижани бермаслиги мумкин. Шу боис қурғоқчиликка, иссиққа ва турли касалликларга чидамли, сувдан самарали фойдаланадиган, юқори ҳосилдорликка эга янги навларни яратиш ва амалиётга жорий этиш бугунги куннинг долзарб вазифаларидан биридир.

Вазир ўз нутқида ушбу жараёнда илм-фан ва халқаро ҳамкорликнинг ўрнига алоҳида эътибор қаратди. Вазирнинг таъкидлашича, бугунги конгресс шунчаки тажриба алмашиш майдони эмас, балки умумий муаммоларга биргаликда ечим топиш, илмий салоҳиятни бирлаштириш ва келажак уруғчилигининг устувор йўналишларини белгилаш учун муҳим.

Вазир конгресс доирасида илгари суриладиган таклиф ва ташаббусларни атрофлича кўриб чиқишга тайёр эканини ҳам билдирди.

Шунингдек, вазир ўз нутқида генетика ва эпигенетика масалаларига ҳам алоҳида тўхталиб, Ўзбекистонда генетика ва эпигенетикага асосланган қишлоқ хўжалигини ривожлантириш бошланганини таъкидлади. Шунингдек, конгресс иштирокчиларига мурожаат қилиб, бугунги иқлим ўзгаришлари шароитида янги, истиқболли уруғ навларини яратиш учун замонавий дастурлар ва инновацион ёндашувларни ишлаб чиқиш, илмий ҳамкорликни янада кучайтириш зарурлигини қайд этди.