Ўзбекистон ва БМТ Туризм «2027 йил — Халқаро барқарор ва яшовчан туризм йили» очилиш маросимига биргаликда тайёргарлик кўришга келишиб олди

Мулоқот давомида Ўзбекистон ва БМТ Туризм ўртасидаги стратегик ҳамкорликни янада мустаҳкамлаш, туризмни барқарор ривожлантириш тамойилларини илгари суриш, туристик йўналишларнинг рақобатбардошлигини ошириш, инсон капиталини ривожлантириш, шунингдек, халқаро ва минтақавий ҳамкорликни кенгайтириш масалалари муҳокама қилинди.

Учрашувда БМТнинг «2027 йил — Барқарор ва яшовчан туризм халқаро йили»нинг расмий очилиш маросимига тайёргарлик масаласига алоҳида эътибор қаратилди. Мазкур маросим 2026 йил ноябрь ойида Тошкент шаҳрида «Ипак йўлида туризм» Тошкент халқаро туризм ярмаркаси доирасида ўтказилиши режалаштирилган. Очилиш маросимини Ўзбекистонда ўтказиш ташаббуси Ўзбекистон Республикаси Президенти Шавкат Мирзиёев томонидан 2026 йил 1 апрель куни БМТ Туризм раҳбарияти билан бўлиб ўтган учрашувда илгари сурилган эди.

Музокараларнинг муҳим натижаларидан бири «2027 йил — Барқарор ва яшовчан туризм халқаро йили»нинг расмий очилиш маросимини ўтказиш тўғрисидаги Битимнинг имзоланиши бўлди. Мазкур ҳужжат тадбирга амалий тайёргарлик кўриш, шунингдек, Ўзбекистон ва БМТ Туризм томонидан амалга ошириладиган чора-тадбирларни мувофиқлаштириш учун зарур ҳуқуқий ва ташкилий асосни яратади.

Очилиш маросимининг Тошкент шаҳрида ўтказилиши барқарор ва яшовчан туризм тамойилларини халқаро миқёсда илгари суришга хизмат қилади. Шу билан бирга, мазкур нуфузли халқаро тадбир Ўзбекистоннинг глобал туристик кун тартибини шакллантиришдаги фаол иштирокини янада кучайтириш ва 2027 йил доирасида халқаро ҳамкорликни ривожлантириш учун муҳим платформа бўлиб хизмат қилади.

Шу билан бирга, Бош котиб Давлат Раҳбари томонидан илгари сурилган Хавфсиз туризм кодексини ишлаб чиқиш жараёни шахсий назоратида эканлиги ҳамда давлатлар ва халқаро экспертлар билан ишлар жадаллаштирилаётганини маълум қилди.