Португалия Республикасига амалга оширилган ташрифга оид

Форумда Португалиянинг етакчи компаниялари ва инвестиция доиралари вакиллари иштирок этиб, глобал иқтисодиётдаги ўзгаришлар шароитида барқарор таъминот занжирларини шакллантириш, инвестиция муҳитини яхшилаш ҳамда ҳудудлараро ҳамкорликни ривожлантириш муҳимлиги алоҳида таъкидланди.

Шунингдек, муҳандислик, қишлоқ хўжалиги, энергетика, транспорт, туризм, ахборот технологиялари соҳаларида ҳамкорликни чуқурлаштириш учун кучли салоҳият мавжудлиги қайд этилди.

Форум икки мамлакат иқтисодиётларининг бир-бирини тўлдирувчи кучли жиҳатларини юзага чиқарди ҳамда барқарор, инновацияга йўналтирилган ҳамкорликни ривожлантиришга бўлган умумий қизиқишларни намоён этди.

ТИВ раҳбари бизнес-форумни ташкил этишда кўрсатган кўмаги учун Португалия саноат ассоциацияси вице-президенти Ж.Паишга миннатдорлик билдирди.

Шу куни Бахтиёр Саидов Португалия ташқи ишлар вазири Паулу Ранжел билан учрашди.

Учрашувда Ўзбекистон – Португалия муносабатларини янги босқичга олиб чиқиш, сиёсий мулоқотни фаоллаштириш ҳамда савдо-иқтисодий ва инвестициявий ҳамкорликни кенгайтириш масалаларига алоҳида эътибор қаратилди.

Агросаноат, инфратузилма, “яшил” энергетика, туризм, транспорт, маданий-гуманитар ва бошқа муҳим соҳаларда қўшма лойиҳаларни йўлга қўйишга келишиб олинди.

Шунингдек, вазирликлар ўртасида ахборот алмашинуви ва илғор тажрибаларни ўзаро ўрганишга қаратилган Англашув меморандумини имзоланди.

Мазкур ҳужжат икки томонлама алоқаларни янада мустаҳкамлаш, институционал мулоқотни чуқурлаштириш ҳамда самарали ҳамкорлик механизмларини йўлга қўйишга хизмат қилади.