Сеул шаҳрида Ўзбекистон – Корея IТ-бизнес альянси ташкил этилди ва келишув имзоланди

Сеул шаҳрида ташкил этилган маросимда Кореянинг энг етакчи 6 та IT ассоциациялари, жумладан, Корея халқаро саноатлаштиришда ҳамкорлик институти (KIIIC), Корея Softw Ассоцияси (KOSA), Корея хизматлар саноати институти (KSI), Корея информацион технологиялари хизмати саноати Ассоциацияси (ITSA), Корея фан ва саноат Ассоциацияси (RNDIA), Корея EduTech Ассоциацияси (KETIA), Сеул Рақамлаштириш фонди (SDF), Кенгбук технопарки ҳамда Ўзбекистонга қизиқиши катта бўлган BizData, Miso Info Tech, SonoArchi, Sangjin CNT, KoMapper, KnowWhere каби IT корхоналари иштирок этди. 

Тадбирда чиқиш қилган Рақамли технологиялар вазири Ш. Шерматов ўзбек ва корейс миллатлари орасидаги тарихий, сиёсий ва маданий яқинлик, шунингдек, Ўзбекистонда яратилган имкониятлар, имтиёзларга эга бўлган, нисбатан арзон бироқ кучли мутахассисларга эҳтиёжи бор кореялик компаниялар учун Ўзбекистонни танлаш айни муддао эканлигини таъкидлаб ўтди. 

Тадбирда Корея IT компанияларидан аутсорсинг буюртмаларини Ўзбекистонга жалб қилиш ва Корея компанияларини Ўзбекистонда ўз офисларини очиш ишларини жадаллаштириш ва бу борада амалий ҳамкорлик қилиш мақсадида IT Park Uzbekistan бош директори Ф. Ибрагимов ва ва Кореянинг KIIIC (Korea Institute of International Industrial Cooperation) раиси Жонг Ок-Рае ўртасида Ўзбекистон-Корея IT Бизнес Альянсини ташкил этилди ва бу бўйича келишув шартномаси имзоланди. 

Мазкур келишувга кўра, мамлакатимизнинг Корея бозорига IT-хизматлар экспортини ошириш, компаниялар билан музокаралар олиб бориш ва Ўзбекистонни янги аутсорсинг йўналиши сифатида илгари суриш мақсадида Корея ва Ўзбекистонда ҳамкор IT-ваколатхоналар очилади. Шунингдек, мазкур иттифоқ орқали Корея бозорида ўз лойиҳалари ва хизматларини тарғиб қилишга қизиққан ўзбек компанияларига амалий ёрдам кўрсатилади. 

Тадбир чоғида “Seul Digital Foundation” ва “Miso Information Technology” IT бизнес-альянснинг биринчи иштирокчи компанияларига айланишди.