Нукусда Ўзбекистон Экологик партияси Қорақалпоғистон Республикаси партия ташкилоти ташаббуси билан “Ҳудудларда чиқиндилар билан ишлаш ҳолати” мавзусида матбуот анжумани бўлиб ўтди.

Таъкидланганидек, Ўзбекистон Республикаси Президентининг 2020 йил 29 сентябрдаги “Маиший ва қурилиш чиқиндилари билан боғлиқ ишларни бошқариш тизимини янада такомиллаштириш чора-тадбирлари тўғрисида”ги қарори ижроси доирасида жорий йилнинг ӯтган ойлари мобайнида қатор ишлар амалга оширилди. Жумладан, Қорақалпоғистон Республикаси Экология ва атроф муҳитни муҳофаза қилиш қўмитаси билан ҳамкорликда атроф муҳитни ҳимоя қилиш, чиқиндиларнинг зарарли оқибатларидан асраб-авайлаш мақсадида “Табиатни чиқиндилардан асраймиз!” шиори остида экологик акция мунтазам ӯтказиб келинмоқда.

Қорақалпоғистон Республикаси ҳудудларида санитар тозалаш хизматига қамраб олиш даражаси 91 фоизни ташкил этмоқда. Худудларда санитар тозалаш хизматларига қамраб олиш талаб этиладиган 2486 та ташкилотнинг 1283 таси билан шартнома имзоланди. Қаттиқ маиший чиқиндиларни қайта ишлаш соҳасида 5 та корхона ва иккиламчи хомашё маҳсулотларини қабул қилувчи 9 та шохобча ва бошқа ишлаб чиқариш корхоналари томонидан жорий йилда 7131 тонна полиэтилен, пластмасса, қоғоз, текстиль, шиша, металл, техник мой, резина, қурилиш, ёғоч маҳсулотлари ва бошқа чиқиндилар қайта ишланиб, қайта ишлаш даражаси 10,02 фоизни ташкил этмоқда. Маиший чиқиндиларни тўплаш ва олиб чиқиб кетиш хизматларини ташкил этиш соҳасида хусусий сектор улуши 14,4 фоизга, қаттиқ маиший чиқиндиларни йиғиш шохобчаларнинг сони 624 тага, чиқиндиларни тўплаш контейнерлар сони 782 тага етказилди.

Ўзбекистон Республикаси Президентининг 2018 йил 18 майдаги “Маиший чиқиндилар билан боғлиқ ишларни амалга ошириш тизимини янада такомиллаштириш чора-тадбирлари тўғрисида”ги қарорига асосан, чиқиндилар билан боғлиқ ишларни амалга ошириш тизимини мувофиқлаштириш ва такомиллаштириш бўйича республика комиссиясининг мажлис баёни ижросини таъминлаш мақсадида, жорий йилда Қорақалпоғистон Республикаси “Тоза ҳудуд” давлат унитар корхонаси учун жами 6 миллиард 876 миллион сўм ажратилиши режалаштирилган бўлиб, шундан 9 та чиқинди ташиш, 1 та чиқиндиларни зичловчи техника, 37 та чиқиндиларни жойлаштириш контейнери харид қилиш учун шартнома тузилди.

Германия Федератив Республикаси билан ҳамкорликда “Маиший чиқинди полигонларни рекультивация қилиш ва янги полигонларни қуриш” лойиҳасини амалга ошириш режалаштирилган бўлиб, шундан 120 миллион АҚШ доллари ҳисобига Қорақалпоғистон Республикасида 4 та чиқинди саралаш полигони ва 8 та чиқиндиларни қайта юклаш станциясини қуриш белгиланган.

Мазкур қарор ижросини таъминлаш бўйича Тўрткўл, Қўнғирот, Қораўзак туманлари ва Нукус шаҳри ҳокимликларнинг қарори билан ер майдони ажратилган бўлиб, уларнинг экологик хавфсизлик ва атроф-муҳитга таъсир чораларини аниқлаш учун лойиҳалар ишлаб чиқилмоқда. Шунингдек, 8 та чиқиндиларни қайта юклаш станциясини қуриш учун Хўжайли, Амударё, Беруний, Элликқаъла, Қонликўл, Мўйноқ, Чимбой ва Тахтакўпир туманлари танлаб олиниб, ҳозирги вақтда лойиҳалари ишлаб чиқилди. Осиё тараққиёт банки иштирокидаги “Қаттиқ маиший чиқиндиларни барқарор бошқариш” лойиҳаси ҳисобига 18 та чиқинди ташиш техникаси, 360 та чиқинди контейнер, 1 та экскаватор, 1 та тиркамали шатакка олувчи махсус транспорт воситаси, 1 та техник ёрдам автомобилини ва 1 та сервис марказни харид қилиш белгиланган. Аслида табиатни асраш инсон умрини узайтириш кафолатидир. Бу борадаги барча чоралар кўрилиши зарур.

Тадбирда амалга оширилаётган кенг кӯламли ишлар билан бирга йӯл қӯйилаётган камчиликлар қайд этилди. Уларни бартараф этиш юзасидан фикр-мулоҳазалар билдирилди.