Халқаро молия маркази ва тижорат судини ташкил этиш масалалари муҳокама қилинди.

Унда мамлакатимизда амалга оширилаётган кенг кўламли ислоҳотлар ҳамда Ўзбекистоннинг инвестициявий жозибадорлигини оширишга қаратилган ташаббуслар муҳокама қилинди.

Учрашув давомида бугунги кунда халқаро савдо ва инвестиция муносабатларининг жадал ривожланиши низоларни ҳал этишнинг самарали ва ишончли механизмларини талаб этаётгани таъкидланди. Шу муносабат билан жаҳон амалиётида халқаро тижорат арбитражи ҳамда инглиз ҳуқуқи тамойилларига асосланган махсус суд институтлари кенг қўлланилаётгани қайд этилди.

Хусусан, Ўзбекистонда халқаро бизнес муҳитини янада ривожлантириш, инвесторлар ҳуқуқларини самарали ҳимоя қилиш ҳамда халқаро ҳуқуқий стандартларни жорий этиш масалаларига алоҳида эътибор қаратилаётгани таъкидланди. Шу нуқтаи назардан “Халқаро молия маркази тўғрисида”ги Ўзбекистон Республикаси Конституциявий қонуни лойиҳасини ишлаб чиқиш ҳамда унинг доирасида Тошкент халқаро молия маркази суд органи ҳисобланган Тошкент халқаро тижорат судини ташкил этиш муҳим ташаббус сифатида қайд этилди.

Учрашув якунида томонлар ўзаро тажриба алмашиш, илғор халқаро амалиётларни жорий этиш ҳамда ҳамкорликни янада кенгайтириш бўйича келгусидаги истиқболларни белгилаб олдилар.