Зарафшон дарёси ҳавзасида сув ресурсларини барқарор бошқариш бўйича янги лойиҳа ишга туширилади

Учрашувда томонлар атроф-муҳитни муҳофаза қилиш соҳасида икки томонлама ҳамкорликни мустаҳкамлаш масалаларини муҳокама қилдилар. Хусусан, ҳукуматлараро манфаатли ҳамкорликни мустаҳкамлаш, мамлакатда иқтисодий-ижтимоий ва экологик ислоҳотларни қўллаб-қувватлашга тайёр эканлиги билдирилди.

Музокаралар давомида "Зарафшон дарёси ҳавзасида сув ресурсларининг иқлимга чидамлилигини интеграциялашган тизимлар орқали бошқариш" лойиҳаси муваффақиятли рўйхатга олингани ва ишга туширилгани маълум қилинди.

Маълумот ўрнида айтиш жоизки, мазкур лойиҳадан кўзланган мақсад Зарафшон дарёси ҳавзасининг Ўзбекистон ҳудудидаги қисмида сув ресурсларини комплекс бошқаришни такомиллаштиришдан иборат. Ёндашувларни ишлаб чиқиш учун асосий эътибор 3000 гектарлик тажриба майдонига қаратилади. Ушбу ҳудудларда 100 нафар фермер билан суғориш, қишлоқ хўжалиги техникаси ва сув ҳисобини яхшилаш бўйича ишлар олиб борилади. Лойиҳа Швейцариянинг CARITAS консорциуми (CACH) ва Марказий Осиё минтақавий экология маркази (РЭЦЦА) томонидан уч босқичда амалга оширилади.

Шунингдек, учрашувда  Экология вазирлиги ҳузуридаги Марказий Осиё атроф-муҳит ва иқлим ўзгаришини ўрганиш университети (Green University) билан сув ресурслари соҳасидаги Швейцариянинг етакчи университетлари ўртасидаги ҳамкорлик масаласи ҳам муҳокама қилинди.