Фавқулодда вазиятлар вазири генерал-майор А.Х.Қўлдошев Ҳиндистонда бўлиб ўтган ШҲТга аъзо давлатларнинг фавқулодда вазиятлар идоралари раҳбарлари йиғилишида иштирок этди
2023-04-20 20:20:30 / Мажлислар
Мазкур нуфузли анжуман давомида, иштирокчилар фавқулодда вазиятларнинг, жумладан трансчегаравий хусусиятга эга фавқулодда вазиятларнинг олдини олиш ва оқибатларини бартараф этишда кўп қиррали ҳамкорликни мустаҳкамлашга доир қатор муҳим масалаларни муҳокама қилдилар. Мавзу юзасидан Ўзбекистон Фавқулодда вазиятлар вазири генерал-майор А.Х.Қўлдошев томонидан маъруза қилиниб, бир қатор аниқ ташаббус ва таклифлар билдирилди.
Шунингдек, ФВВ раҳбари мамлакатимизда аҳолини ва ҳудудларни барча турдаги табиий ҳамда техноген турдаги офатлардан муҳофаза қилиш борасида амалга оширилаётган ишлар ҳақида маълумот берди.
Бундан ташқари, форум доирасида фавқулодда вазиятлар идоралари раҳбарлари ўзаро учрашувлар ўтказиб, унда ҳамкорликнинг кейинги истиқболлари муҳокама қилинди. Унда қўшма семинарлар, тренинглар ва машғулотлар ўтказилишига алоҳида урғу берилди.
Йиғилиш якунлари бўйича Фавқулодда вазиятларнинг олдини олиш ва табиий офатлар хавфини камайтириш бўйича ҳамкорлик самарадорлигини оширишга қаратилган комплекс чора-тадбирларни акс эттирувчи баённома имзоланди.