Етакчи банклар учун стартапчиларнинг лойиҳалари тақдимот қилинди ҳамда стартапчилар ва банклар ўртасида бу каби ҳамкорлик учрашувларини мунтазам ташкил этиб боришга келишилди

Жорий йилнинг 8 май куни етакчи банк раҳбарлари билан бўлиб ўтган дастлабки учрашувда венчур ва стартап экотизимини ривожлантириш бўйича ҳамкорликни йўлга қўйиш ва тизимли равишда стартаплар асосчилари билан учрашувлар ўтказиб боришга келишиб олинган эди. 

Бугунги тақдимотда Президентнинг иқтисодиёт соҳаларини ривожлантириш, инвестиция ва ташқи савдо сиёсатини амалга ошириш масалалари бўйича маслаҳатчисининг биринчи ўринбосари Тимур Ишметов ҳамда Рақамли технологиялар вазири Шерзод Шерматов, Ўзбекистондаги етакчи банклар раҳбар-ходимлари, шунингдек, компанияларнинг стартапчилари иштирок этди.

Ушбу ҳамкорлик йиғилишида Суғурта Бозор, Jett, Mohirdev, Coozin, Ustabor, Depozit.uz – Finq, Beautify, AirCaravan, The Mind, YOTO, KPI, Cradle AI, zypl.ai стартапчиларнинг тақдимотлари ўтказилди. 

Тадбирда Plug and Play Uzbekistan вакили ҳам сўзга чиқди. Унда компаниянинг Ўзбекистондаги фаолияти ва Plug and Play компаниясининг дунёнинг етакчи банклари билан ўзаро ҳамкорлик қилиш тажрибаси ҳақида қисқача маълумот берилди.

Бундан ташқари, тақдимоти ўтказилган барча стартапларни ҳар бир банкда жорий қилиш учун алоҳида тақдимотлар қилиш масалалари муҳокама қилинди.

Тақдимот якунида яратилган стартаплар учун инвестициялар жалб қилиш ва маҳсулотларни банк тизимларига ҳам жорий қилиш имкониятлари муҳокама қилинди. Шунингдек, стартаплар ва банклар ўртасида мунтазам учрашувларни ташкил этиб бориш ҳамда келгусида ўзаро ҳамкорликда ишлашга келишиб олинди.