Ўзбекистон-Италия: аграр соҳадаги ҳамкорлик йўналишлари

Учрашувда вазир бугунги кунда мамлакатларимиз ўртасида аграр соҳадаги ҳамкорлик фаол суръатларда ривожланиб бораётганини ва бу масалаларни муҳокама қилиш имконига эга бўлганидан мамнун эканлигини таъкидлади.

Бундан ташқари, Азиз Воитов қишлоқ хўжалигини механизациялаш ва сувни тежашнинг замонавий тизимларидан фойдаланиш бўйича ҳамкорликда ишлаш йўналишларини белгилаб берди.

Учрашувда жорий йилнинг июн ойи бошида Италия Қишлоқ хўжалиги, озиқ-овқат ва ўрмон сиёсати вазирлиги билан олий даражадаги ташриф олдидан алоқа ўрнатиш масаласи муҳокама қилинди. Кейинги мавзу 2023-йил 8-11-май кунлари Миланда бўлиб ўтадиган “TuttoFood- 2023” кўргазмасига тўхталинди. Таъкидланишича, Ўзбекистон аста-секин қишлоқ хўжалиги маҳсулотларини экспортчи давлатларидан бирига айланиб бормоқда ва бугунги кунда 100 тага яқин давлатга 80 дан ортиқ турдаги янги ва қайта ишланган мева-сабзавот маҳсулотларини етказиб бермоқда.

Ушбу кўргазмада “Ўзбекистонда ишлаб чиқарилган” стендида мамлакатимиздан 10 нафар тадбиркор ўз маҳсулотларини намойиш этади. “Шунингдек, биз мамлакатларимиз тадбиркорлари ўртасида тўғридан-тўғри муносабатларни ўрнатиш учун Италиядаги бошқа кўргазмаларда иштирок этиш ниятидамиз. Бундан ташқари, биз мамлакатимизда ўтказиладиган кўргазмаларда Италия бизнес вакилларини қабул қилишга тайёрмиз”, – деди Азиз Воитов.

Учрашувнинг навбатдаги масаласи Италиянинг озиқ-овқат соҳасидаги етакчи компаниялари билан ҳамкорликни йўлга қўйиш билан боғлиқ бўлди. Масалан, Parmalat (сут маҳсулотлари, айланмаси 6,6 миллиард доллар), Cremonini (гўшт ва гўшт маҳсулотлари, 4,0 миллиард доллар), Ferrero (қандолат маҳсулотлари, 12 миллиард доллар), Lavazza (қаҳва, 1,1 миллиард доллар), Barilla holding (макарон, 3,9 миллиард доллар), Iritec (сувни тежайдиган технологиялар) каби таниқли компаниялар.

Ўзбекистон томон меҳмонлардан ушбу компаниялар билан учрашувларни ташкил этишда кўмаклашишни сўради.

Мамлакатимизнинг Жиззах вилояти Бахмал туманида “Opera SRL” ва “BMB Trade Group” билан заъфарон етиштириш бўйича ҳамкорликнинг муваффақиятли намунаси мавжуд. Кейинчалик режа асосида узумчилик ва виночиликни ривожлантириш масаласи ҳам муҳокама қилинди. Узумчилик агротуризмнинг асоси – Ўзбекистон учун янги йўналиш ҳисобланади. Яқин келажакда мамлакатимизда ушбу соҳани янги босқичга кўтариш режалаштирилган.

Учрашувда таълим соҳасидаги ҳамкорликка алоҳида эътибор қаратилди. Таъкидланишича, 2022-йилда Қишлоқ хўжалигида билим ва инноватсиялар Миллий Маркази, Милан университети ва Италиянинг CREA қишлоқ хўжалиги маркази ўртасида Меморандум имзоланган. Ушбу келишувлар доирасида ўзбекистонлик ва италиялик олимлар узумчилик, ўсимликларни ҳимоя қилиш, мева-сабзавотчилик соҳасида илмий лойиҳаларни амалга оширишни бошладилар. Шу нуқтаи назардан, қишлоқ хўжалиги соҳасида бизнинг университетларимизнинг профессор-ўқитувчиларини малакасини ошириш учун Италия университетлари билан алоқаларни ўрнатиш муҳимдир.

Учрашув якунида томонлар режалаштирилган лойиҳаларни амалга ошириш учун кейинги ўзаро келишув шаклини ишлаб чиқишга келишиб олдилар.