Тошкент халқаро инвестиция форуми: истиқболли ва ҳар томонлама манфаатли лойиҳалар тақдимоти

Тақдимотда Қозоғистон, Тожикистон, Россия, Хитой, Европа Иттифоқи мамлакатлари, АҚШ, Саудия, Туркия, БАА, Қатар, Ҳиндистон, Уммон, Жанубий Корея, Қувайт давлатларидан ҳукуматлар вакиллари ва компаниялар раҳбарлари, халқаро ташкилотлар ҳамда молия муассасаларидан делегациялар иштирок этди.

Кейинги йилларда Ўзбекистон Республикаси Президенти Шавкат Мирзиёев томонидан узоқни кўзлаб олиб борилаётган очиқ ва прагматик ташқи сиёсат туфайли қўшни мамлакатлар билан ҳамкорлик алоқалари ҳар томонлама стратегик шериклик ҳамда иттифоқчилик даражасига кўтарилгани алоҳида қайд этилди.

Бугунги кунда Ўзбекистон Марказий Осиё давлатлари билан йирик лойиҳаларни биргаликда амалга ошириш орқали минтақавий иқтисодий кооперацияни ривожлантиришга жиддий эътибор қаратмоқда.

Мазкур жараёнда сув-энергетика йўналишида ҳам ҳамкорликни ривожлантириш муҳим аҳамият касб этади.

Маълумотларга кўра, Ўзбекистоннинг электр энергиясига бўлган талаби йилига ўртача 5-6 фоизга ошиб бормоқда.

Ушбу талабни қоплаш учун, қўшимча генерация қувватлари, хусусан “яшил” электр станцияларини яратиш устувор вазифа қилиб белгиланган.

Сўнгги йилларда 2 миллиард АҚШ долларлик хорижий инвестиция ҳисобига қуввати 1,6 ГВт 9 та қуёш ва шамол электр станцияси тармоққа уланган. Бунинг натижасида 1,5 млрд кВт-соат “яшил” энергия ишлаб чиқарилган.

Айни пайтда хорижий ҳамкорлар билан 14 миллиард АҚШ долларлик 12 ГВтли 31 та “яшил” генерация қувватлари барпо этилмоқда.

Тақдимотда Қирғизистон ва Қозоғистон билан биргаликда қиймати 2,9 миллиард АҚШ долларлик 1860 МВт қувватли “Қамбарота-1” гидроэлектр станцияси лойиҳасини амалга ошириш режаси ҳақида ҳам батафсил маълумот берилди.

Ўзбекистон учун стратегик аҳамиятга эга мазкур лойиҳа Қирғиз Республикаси ҳудудида Норин дарёсида барпо этилиб, йилига 5,6 миллиард кВт-соат экологик тоза энергия ишлаб чиқариш имконини беради.

Билдирилишича, бунда, нафақат экологик тоза энергия ишлаб чиқарилади, балки минтақадаги сув ресурсларини самарали бошқариш ва ундан оқилона фойдаланиш имкони ҳам яратилади.

Жахон банки ушбу лойиҳани амалга оширишни биринчилардан бўлиб қўллаб-қувватлаган ва лойиҳанинг техник-иқтисодий асосномасини ишлаб чиқиш учун 5 миллион доллар грант маблағи ажратган.

Бундан ташқари, тақдимот доирасида минтақанинг энергия ресурсларига бўлган талабини қондиришда яна бир муҳим аҳамиятга эга бўлган лойиҳа Зарафшон трансчегаравий дарёсида Яван гидроэлектр станцияси ҳақида ҳам атрофлича маълумотлар берилди.

Тадбир сўнггида, тақдимотчилар инвесторларни ва халқаро молия институтларини ушбу истиқболли ҳамда ҳар томонлама манфаатли бўлган лойиҳаларда фаол қатнашишга таклиф этди.