White & Case юридик фирмасининг ҳамкори ва АҚШ — Ўзбекистон савдо палатаси раиси Керолин Лемм билан икки томонлама ҳамкорлик истиқболлари муҳокама қилинди

Маълумот учун: White & Case юридик фирмаси АҚШнинг энг кучли юридик фирмалар “Big law” рейтингида биринчи бешталикка кирувчи, 31 та давлатда ўз ваколатхоналари орқали фаолият юритувчи ҳамда Ўзбекистонда илк фаолиятини 1993 йил бошлаган йирик юридик фирмалардандир. К.Лемм учинчи Тошкент халқаро инвестиция форумида иштирок этиш учун мамлакатимизга ташриф буюрган.

Учрашувда томонлар мамлакатнинг инвестицион салоҳиятни мустаҳкамлаш, Тошкент халқаро тижорат судини ташкил этиш, вазирлик ходимларининг White & Case юридик фирмасининг Вашингтондаги офисида малакасини ошириш масалаларида атрофлича фикр алмашдилар.

К.Лемм Ўзбекистонда суд-ҳуқуқ ислоҳотлари ва инвестицион муҳитни яхшилаш борасида амалга оширилаётган ишлар ижобий натижа бераётганини, бунинг аниқ мисоли 2023 йил Вашингтонда ўтказилган Ўзбекистон — Америка бизнес форумида иштирок этган 350 дан ортиқ америкалик инвесторларнинг Ўзбекистонга сармоялар киритишга бўлган иштиёқида ўз аксини топганлигини қайд этди.