Ўзбекистоннинг Андижон шаҳри — 2026 йилда туркий дунёнинг маданият пойтахти деб эълон қилинди

Унда Ўзбекистон Республикаси маданият вазири Озодбек Назарбеков, Қозоғистон Республикаси маданият ва ахборот вазири Аида Балаева, Туркманистон маданият вазири Атагелди Шамирадов, Озарбайжон Республикаси маданият вазири ўринбосари Мурад Гусейнов, Қирғиз Республикаси маданият, ахборот ва ёшлар сиёсати вазирининг биринчи ўринбосари Аскарали Мадаминов, Туркия Республикаси маданият ва туризм вазирининг ўринбосари Сердар Чам, ТУРКСОЙ Бош котиби Султон Раев иштирок этди.

Йиғилишда ТУРКСОЙ томонидан жорий йилда амалга оширилган ишлар таҳлил қилиниб, 2026 йилда ўтказиладиган тадбирлар режаси, қўшма лойиҳалар ва туркий дунёнинг маданий соҳадаги ҳамкорлигини янада мустаҳкамлашга оид масалалар муҳокама қилинди.

Шунингдек, жорий йилда Туркий давлатлар ташкилотининг Габала шаҳрида бўлиб ўтган саммити доирасида қабул қилинган “ТУРКСОЙ ташкилотини ривожлантириш ва мустаҳкамлаш тоғрисида”ги қарор ижросини таъминлаш долзарблиги таъкидланди.

Ўзбекистон Республикаси маданият вазири Озодбек Назарбеков бу жуда муҳим ҳужжат эканини алоҳида қайд этиб, унинг ижроси ТУРКСОЙнинг халқаро ташкилот сифатидаги мақоми ва мавқейини юксалтиришга хизмат қилишини билдирди. Шу билан бирга, қатор таклиф ва ташаббусларни илгари сурди.

Маълумки, ТУРКСОЙ Доимий кенгаши қарори билан ҳар йили туркий тилли давлатлардаги шаҳарлардан бири “Туркий дунёнинг маданият пойтахти” сифатида эълон қилинади. Бундай мақомга эга бўлган шаҳарда ва ҳамкор давлатларда қатор маданий тадбирлар, фестиваллар, илмий анжуманлар, учрашувлар ташкил этилади. Бу орқали миллий маданият халқаро миқёсда кенг тарғиб қилинади. Қолаверса, бундай тадбирлар сайёҳлар оқимини оширишга ҳам хизмат қилади.

Қувонарлиси шундаки, ТУРКСОЙ Доимий кенгашининг 42-йиғилишида “Андижон шаҳри — 2026 йилда туркий дунёнинг маданият пойтахти” деб эълон қилинди.

Бу хушхабар йиғилиш иштирокчилари томонидан олқишлар билан кутиб олинди. Куннинг иккинчи ярмида бўлиб ўтадиган “Ақтау — 2025 йилда туркий дунёнинг маданият пойтахти” тадбирларининг тантанали ёпилиш маросимида Андижон шаҳри ҳокимлигига махсус сертификат топширилади.

Доимий кенгаш йиғилиши якунида кун тартибида кўриб чиқилган масалалар юзасидан қарор қабул қилиниб, тегишли ҳужжатлар имзоланди.

Эслатиб ўтамиз, 2020 йилда Хива шаҳри туркий дунёнинг маданият пойтахти бўлганди.