Ўзбекистон Республикаси Тоғ-кон саноати ва геология вазирлиги ҳузуридаги Тоғ-кон саноати ва геология соҳасини назорат қилиш инспекцияси

Инспекцияда ушбу йўналишдаги фаолият Ўзбекистон Республикасининг 2017 йил 11 сентябрдаги “Жисмоний ва юридик шахсларнинг мурожаатлари тўғрисида”ги Ўзбекистон Республикаси Қонунига ўзгартириш ва қўшимчалар киритиш ҳақида”ги ЎРҚ-445-сонли Қонуни талаблари асосида ташкил этилган бўлиб, ижро сифати ва самарадорлигини тубдан яхшилашга хизмат қилмоқда. Аҳолига қулайлик яратиш мақсадида Инспекция бошлиғининг виртуал қабулхонаси, махсус ишонч телефони, @kontexnazorat_murojaat_bot расмий телеграм канали ҳамда расмий веб-сайтдаги онлайн маслаҳатчи модули узлуксиз ишлаб турибди.

Давлат раҳбари ҳузурида 2026 йил 13 март куни мурожаат кўриб чиқиш тизимини такомиллаштириш бўйича ўтказилган видеоселектор йиғилишида белгиланган устувор вазифалар ижросини таъминлаш мақсадида, жорий йилнинг биринчи ярим йиллиги давомида Инспекция бошлиғи ва унинг ўринбосари томонидан Андижон ҳамда Фарғона вилоятларида сайёр қабуллар ташкил этилди. Ушбу очиқ мулоқотлар давомида келиб тушган мурожаатлар атрофлича ўрганилиб, уларнинг салмоқли қисми жойида ҳал этилди. Вақт талаб қиладиган масалалар бўйича эса аниқ муддатлар белгиланган чора-тадбирлар режаси ишлаб чиқилиб, ижрога йўналтирилди.

Инспекцияга 2026 йил 2 июнь ҳолатига кўра, жисмоний ва юридик шахслардан жами 146 та мурожаат келиб тушган бўлиб, уларнинг ҳудудлар кесимидаги таҳлили қуйидагича:

• Қашқадарё вилояти — 31 та

• Бухоро вилояти — 27 та

• Навоий вилояти — 21 та

• Сурхондарё вилояти — 17 та

• Тошкент вилояти — 14 та

• Наманган вилояти — 9 та

• Андижон вилояти — 9 та

• Фарғона вилояти — 8 та

• Самарқанд вилояти — 5 та

• Тошкент шаҳри — 5 та

Келиб тушиш каналлари бўйича таҳлил қилинганда, мурожаатларнинг 83 таси Президент виртуал қабулхонаси орқали, 49 таси электрон шаклда ҳамда 14 таси Инспекциянинг ишонч телефони орқали қабул қилинган.

Инспекция масъуллари томонидан ҳар бир мурожаат қонуний кўриб чиқилиши натижасида, уларнинг 119 таси қаноатлантирилди. Мурожаатларнинг 20 таси Инспекция ваколатига кирмаганлиги боис, қонунчиликда белгиланган тартибда тегишли ташкилотларга юборилди. Бугунги кунда 7 та мурожаатни кўриб чиқиш жараёни давом этмоқда ва улар бўйича якуний қарорлар қисқа муддатларда қабул қилинади.

Инспекция аҳоли ва соҳа вакилларидан келиб тушаётган ҳар бир мурожаатга тизимдаги камчиликларни бартараф этиш ҳамда иш сифатини оширишнинг муҳим мезони сифатида қарайди. Очиқлик, шаффофлик ва қонун устуворлиги бундан буён ҳам фаолиятимизнинг бош тамойили бўлиб қолади.