Ангрен кон-техника инспекцияси: Хавфсизлик тадбирлари ва бахтсиз ҳодисалар таҳлили
2026-04-28 10:10:00 / Янгиликлар
Ҳисобот даврида инспекция мутахассислари томонидан учта йирик кўнгилсиз ҳодиса юзасидан махсус текширувлар олиб борилди. Хусусан, 21 март куни “Ўзбеккўмир” АЖнинг “Темир йўл транспорти” филиалида техник носозликни бартараф этиш чоғида электровоз машинисти ёрдамчиси жароҳатланган. Мазкур ҳолат бўйича ҳужжатлар тўпланиб, ҳуқуқий баҳо бериш учун Ангрен шаҳар ИИБ тергов бўлимига топширилди. Шунингдек, “Шарқий-Қурама” дала экспедицияси ҳамда “Вагонлар таъмирлаш депоси”да юз берган оғир тан жароҳати билан боғлиқ ҳолатлар юзасидан ҳам комиссия ишлари давом этмоқда.
Саноат хавфсизлигини таъминлаш мақсадида инспекция томонидан қуйидаги чоралар кўрилди:
-
Техник кўриклар: “NISHBASHKO‘MIR” МЧЖ хорижий корхонасида камерал текширув ўтказилди ва 30 апрелга қадар хавфсизлик чораларини мувофиқлаштириш белгиланди.
-
Геологик назорат: “GEOREZERV” МЧЖ ҳудудидаги Наугарзон конида юзага келган янги ер ёриқлари ўрганилиб, кўчки хавфининг олдини олиш бўйича тавсиялар берилди.
-
Профилактика: “Ўзбеккўмир” АЖ таркибидаги корхоналарда 5 маротаба қўшимча келишувсиз профилактик тадбирлар ўтказилди.
Бундан ташқари, инспекция ходимлари кадрларни тайёрлаш сифатини назорат қилиш мақсадида “Ўқув маркази”да экскаватор машинисти ва электрочилангар мутахассислиги бўйича таҳсил олган ходимларнинг якуний имтиҳонларида иштирок этишди.
Ушбу назорат тадбирлари тоғ-кон саноатида технологик интизомни мустаҳкамлаш ва инсон ҳаёти учун хавф туғдириши мумкин бўлган омилларни вақтида бартараф этишга хизмат қилади. Ишлаб чиқаришдаги ҳар бир ҳодисанинг чуқур таҳлил қилиниши келгусида шунга ўхшаш хатоларнинг такрорланмаслигини таъминловчи профилактика механизмининг муҳим бўғинидир.