Тергов ҳужжатларига кўра, "Т.Н.М." МЧЖга Пискент туманидаги "Истиқлол-III" конининг 8,0 гектар ер майдонидан фойдали қазилмаларни қазиб олиш учун Вазирлик томонидан расмий лицензия тақдим этилган. Бироқ жамият мансабдор шахслари Вазирлар Маҳкамасининг 2018 йил 4 декабрдаги 983-сонли қарори талабларига зид равишда, белгиланган тартиб ва чегараларга амал қилмасдан, ўзбошимчалик билан фаолият юритишган. Хусусан, қазиш ишлари лицензия бўйича рухсат берилган 8,0 гектарлик ҳудуд чегарасидан ташқарида амалга оширилганлиги аниқланган.

Ўтказилган ўрганишлар натижасида лицензия ҳудуди чегарасидан ташқарида жами 93 299 куб метр қум-шағал аралашмаси ўзбошимчалик билан қазиб олинганлиги маълум бўлди. Ушбу ноқонуний ҳаракатлар оқибатида давлат ва жамият манфаатларига жами 2 861 200 433 сўм миқдорида жуда кўп миқдордаги моддий зарар етказилган. Ҳозирда прокуратура органлари томонидан ушбу жиноят иши доирасида тергов ҳаракатлари давом эттирилмоқда.

Жалолиддин Бозорхонов — Тоғ-кон саноати ва геология соҳасини назорат қилиш инспекцияси бош юрисконсульти