Коррупцияга қарши курашиш рейтинги: Инспекция 92 балл билан юқори кўрсаткичга эришди
2026-04-10 11:45:00 / Янгиликлар
Тоғ-кон саноати ва геология соҳасини назорат қилиш инспекцияси 2025 йил якунлари бўйича ўтказилган рейтинг баҳолашда кескин ижобий натижа қайд этди. Инспекция жами 100 баллдан 92 балл тўплаб, ўз фаолият самарадорлигини “аъло” даражага кўтарди. Бу кўрсаткич ташкилотда коррупцияга нисбатан муросасиз муносабат тизимли равишда шаклланганидан далолат беради.
Баҳолаш жараёни Ўзбекистон Республикаси Коррупцияга қарши курашиш агентлигининг «E-Anticor.uz» электрон платформаси орқали амалга оширилди. Жарайонда Агентлик мутахассислари билан бирга 9 нафар мустақил экспертдан иборат комиссия аъзолари иштирок этди. Инспекция фаолияти 5 та муҳим йўналишдаги 29 та индикатор асосида синчиклаб ўрганилди.
Хусусан, инспекцияда коррупцияга қарши курашишнинг ҳуқуқий асослари яратилганлиги, коррупциявий хавф-хатарларнинг тўғри баҳоланиши ва уларни бартараф этиш чоралари юқори баҳоланди. Шунингдек, раҳбарларнинг ушбу иллатга қарши шахсий намунаси ва ходимларнинг ҳуқуқий саводхонлигини ошириш бўйича қилинган ишлар ҳам таҳлил қилинди. Аҳоли ўртасида ўтказилган тарғибот тадбирларининг самарадорлиги ҳам якуний баллга ижобий таъсир кўрсатди.
Таъкидлаш жоизки, ушбу натижа тизимли меҳнат маҳсулидир. Зеро, Инспекция 2022 йилда 34 балл, 2023 йилда 21 балл ва 2024 йилда 0 балл билан “қониқарсиз” тоифасида бўлган. Қисқа вақт ичида коррупцияга қарши курашиш бўлими томонидан халқаро стандартларнинг жорий этилиши вазиятни тубдан ўзгартирди. Бунинг эътирофи сифатида 2026 йил 6 апрел куни Коррупцияга қарши курашиш агентлиги томонидан Инспекцияга махсус миннатдорчилик хати тақдим этилди.
Рейтинг натижаларига кўра, фаолияти «яхши» деб топилган ташкилотларнинг ижобий тажрибасини оммалаштириш ва масъул ходимларни рағбатлантириш кўзда тутилган. Аксинча, самарадорлик паст бўлган идора раҳбарларига интизомий чоралар кўрилиши белгиланган. Инспекция эришган 92 балл нафақат жамоанинг ютуғи, балки соҳада назорат тизимининг шаффофлашганидан далолатдир.
Ушбу ютуқ давлат назорати органларида қонунийлик таъминланиши иқтисодий барқарорликнинг гарови эканлигини кўрсатади. Коррупциядан холи муҳит инвестициялар оқимини кўпайтиради ва ресурсларнинг мақсадсиз сарфланишига чек қўяди. Инспекция келгусида ҳам бу борадаги назорат механизмларини янада кучайтиришни мақсад қилган.