“Ёшлар ойлиги”да қашқадарёлик ёшлар учун муносиб совға
2025-06-19 18:10:00 / Янгиликлар
Қарши Ёшлар технопаркининг умумий қиймати 13.5 млрд сўм бўлиб, бу ерда бир вақтнинг ўзида 400 нафар ёшни қамраб олиш имконияти мавжуд. “Веб-дастурлаш”, “Робототехника”, “3Д моделлаштириш”, “Электроника, “Видео монтаж”, “График дизайн”, “АвтоКАД” каби 7 турдаги замонавий ўқув курслари доимий фаолият юритади.
Шулар билан бирга, Технопаркда ёшларни инновацион фаолиятларга кенг жалб этиш, Илм-фан, таълим ва ишлаб чиқариш интеграциясини чуқурлаштириш, ёшларнинг “стартап” лойиҳаларини ривожлантириш ва уларни амалга ошириш учун ягона майдон яратиш мақсадида замонавий ишлаб чиқариш ускуналари билан жиҳозланган “ФабЛаб” тажриба-конструкторлик ҳамда “Стартап коворкинг” майдонлари ташкил этилган.
Шунингдек, Технопаркда ёш ихтирочи олимларнинг ғояларини бизнес-моделга айлантириш, бизнес бошқарувида кўмаклашиш ҳамда ёшларнинг тадбиркорлик салоҳиятини ошириш мақсадида “InnoX” бизнес-инкубатор ва акселератор дастури йўлга қўйилади. Бундан ташқари, геология, робототехника, мехатроника, сунъий интеллект, қишлоқ хўжалиги, дастурлаш ва рақамлаштириш йўналишларида лойиҳаларни амалга ошириш ҳамда 20 дан ортиқ хизмат турларини жорий этиш режалаштирилган.