Шаҳрисабзда зотдор Қуёнларни етиштириш кластери муваффақиятли фаолият юритмоқда.
2025-05-16 16:10:00 / Янгиликлар
“Диёрбек имкони раббитс” МЧЖнинг “Қуёнчилик кластерини ташкил қилиш” лойиҳаси аҳоли дастурхонига сифатли, фойдали ва арзон гўшт маҳсулотларини етказиб беришни мақсад қилган.
Маълумки қуёнлар тез етилувчанлиги, жадал ўсиши билан бошқа жониворлардан алоҳида ажралиб туради. Масалан, бузоқчанинг вазни 47-кунга келиб икки баробарга ортса, қуёнча 6-куннинг ўзидаёқ, худди шунча вазн йиғади. Бир ойда эса бу кўрсаткич ўн баробарга, уч ойда 30 баробаргача етади. Бу аҳолини тезда арзон маҳсулот билан таъминлаш имкониятини беради. Қолаверса, сир эмаски 4-5 ойлик қуёнларнинг гўшти энг фойдали ҳисобланади. Бу парҳезбоп емак меъдада осон ҳазм бўлиб, яхши ўзлаштирилади. Танада моддалар алмашинувини яхшилайди, айниқса, атеросклероз ривожланишининг олдини олади. У болалар, кексалар, ҳомиладор ва эмизикли аёллар, оғир хасталикни бошидан кечирган инсонлар, юқори жисмоний юклама билан ишловчилар ва спортчиларга жуда ҳам фойдали озуқа ҳисобланади.
Инновацион ривожланиш агентлиги лойиҳа долзарблигини ва шу каби омилларни инобатга олган ҳолда уни 2022-йилда 1.0 млрд сўм миқдорида тижоратлаштирган эди.
Натижада наслли қуёнларни ҳудуд иқлим шароитига генетик мослаштириш ва кўпайтириш учун зарур шарт-шароитлар яратилди, 500 дан зиёд Европанинг зотли қуёнлари келтирилиб, селекция ишлари ташкил этилди.
Ушбу лойиҳа амалга оширилиши натижасида 10 нафар аҳоли доимий иш билан таъминланди. Шунингдек, қуёнларни етиштириш бойича “Хонадонбай” усули жорий этилиб, ишга ёлланган аҳолининг даромади ортди. Корхонада йилига ўртача 31 500 кг қуён гўшти етиштирилмоқда.
Ҳозирда Самарқанд давлат ветеринария медицинаси, чорвачилик ва биотехнологиялар университети билан хамкорлик йўлга қўйилган бўлиб, соҳага оид илмий – тадқиқот ишлари амалга оширилмоқда.