Самарқандда транспорт соҳасига бағишланган “Миллий саноат занжири” кўргазмаси иш бошлади
2026-07-15 16:50:00 / Янгиликлар
Кўргазмада Олий таълим, фан ва инновациялар вазирлиги ҳамда Инновацион ривожланиш агентлиги ҳам ўз экспозициялари билан фаол иштирок этмоқда. Улар томонидан илм-фан, инновациялар ва ишлаб чиқариш интеграциясини мустаҳкамлаш, илмий ишланмаларни саноатга татбиқ этиш ҳамда инновацион экотизимни ривожлантиришга қаратилган лойиҳалар намойиш этилмоқда.
Алоҳида эътиборга молик жиҳатлардан бири шундаки, кўргазмадан Самарқанд вилоятидаги олий таълим муассасалари профессор-ўқитувчилари ҳамда талаба-ёшлар томонидан ишлаб чиқилган истиқболли стартап лойиҳалар ҳам муносиб ўрин эгаллаган. Мазкур лойиҳаларда транспорт, саноат, рақамли технологиялар, автоматлаштириш ва энергия тежамкорлиги йўналишларидаги инновацион ишланмалар тақдим этилиб, уларни амалиётга жорий этиш ва инвесторлар ҳамда йирик ишлаб чиқарувчилар билан ҳамкорликни йўлга қўйиш имкониятлари яратилмоқда.
“Миллий саноат занжири” кўргазмаси давлат буюртмачилари, маҳаллий ишлаб чиқарувчилар, илмий муассасалар ва ёш новаторларни ягона майдонда жамлаган ҳолда, транспорт саноатида янги кооперацион алоқаларни ривожлантириш, маҳаллий маҳсулотлар рақобатбардошлигини ошириш ҳамда инновацион ғояларни тижоратлаштиришга хизмат қиладиган муҳим платформа сифатида эътироф этилмоқда.