Бюрократияни қисқартириш ва электрон хизматларни такомиллаштириш масалалари муҳокама қилинди
2026-06-11 14:50:00 / Янгиликлар
Инновацион ривожланиш агентлигида “Бюрократияни бартараф этиш – 2030” дастурини амалга ошириш ва инновацияларни жорий этиш бўйича лойиҳа офиси масъул ходимлари иштирокида ишчи учрашув ташкил этилди.
Учрашув давомида Агентлик томонидан кўрсатилаётган электрон давлат хизматлари билан боғлиқ бюрократик жараёнларни кескин қисқартириш, хизматлардан фойдаланиш қулайлигини ошириш ҳамда фуқаролар ва тадбиркорлик субъектлари учун ортиқча вақт ва ресурс сарфини камайтириш масалалари муҳокама қилинди. Шунингдек, “Бюрократияни бартараф этиш – 2030” дастури доирасида амалга оширилиши режалаштирилган чора-тадбирлар юзасидан фикр алмашилди.
Мамлакатимизда давлат бошқаруви тизимини модернизация қилиш, давлат хизматларини рақамлаштириш ва аҳолига кўрсатилаётган хизматлар сифатини ошириш давлат сиёсатининг устувор йўналишларидан бири ҳисобланади. Шу мақсадда бюрократик тўсиқларни бартараф этиш, идоралараро ҳамкорликни кучайтириш, маълумотлар алмашинувини соддалаштириш ҳамда инсон омилини қисқартиришга қаратилган тизимли ислоҳотлар амалга оширилмоқда.
Муҳокамалар давомида Агентлик фаолиятида мавжуд жараёнларни таҳлил қилиш, ортиқча тартиб-таомилларни қисқартириш, электрон хизматларни янада такомиллаштириш ва замонавий инновацион ечимларни жорий этиш бўйича таклифлар кўриб чиқилди.
Мазкур йўналишдаги ишлар натижасида давлат хизматларининг тезкорлиги ва шаффофлигини ошириш, фуқаролар ҳамда тадбиркорлар учун қулай шароитлар яратиш, коррупцион омилларни камайтириш ва давлат бошқаруви самарадорлигини юксалтириш кутилмоқда. Бу эса ўз навбатида аҳоли ва бизнес вакилларининг давлат хизматларидан фойдаланиш имкониятларини кенгайтириб, мамлакатнинг инновацион ривожланишига хизмат қилади.