Сирдарё вилоятида Ўзбекистон Республикаси Президентининг 2026 йил 4 апрелдаги ПФ–54-сон Фармони ижросини таъминлаш, илм-фан ва инновацион фаолиятни ривожлантириш ҳамда янги ишланмалар асосида ишлаб чиқаришни йўлга қўйиш масалаларига бағишланган семинар бўлиб ўтди.

Тошкент кимё-технология институти Янгиер филиалида ташкил этилган мазкур тадбирда Инновацион ривожланиш агентлиги мутахассислари, олий таълим муассасалари профессор-ўқитувчилари, илмий изланувчилар ҳамда тадбиркорлар иштирок этди.

Семинарда таъкидланганидек, ушбу фармонга мувофиқ эндиликда олий таълим ва илмий муассасалар муассислигида янги ишланмаларга асосланган “spin-off” корхоналарни ташкил этиш имконияти яратилди. Бу эса илмий тадқиқот натижаларини бевосита ишлаб чиқаришга жорий этиш, инновацион маҳсулотлар яратиш ҳамда уларни тижоратлаштиришда муҳим босқич ҳисобланади.

Тадбир давомида сўзга чиққан мутахассислар “spin-off” корхоналарни ташкил этишнинг ҳуқуқий асослари, уларни молиялаштириш манбалари, хусусан, венчур инвестицияларни жалб этиш имкониятлари ҳамда бундай корхоналар фаолиятини самарали йўлга қўйиш механизмларини батафсил тушунтириб бердилар.

Шунингдек, олий таълим муассасаларида яратилаётган илмий ишланмаларни ишлаб чиқариш билан интеграция қилиш, инновацион ғояларни тижоратлаштириш ва уларни иқтисодиёт тармоқларига жорий этиш орқали қўшимча қиймат яратиш масалаларига алоҳида эътибор қаратилди.

Семинар якунида иштирокчилар томонидан “spin-off” корхоналар фаолиятини йўлга қўйиш юзасидан таклиф ва мулоҳазалар билдирилди. Келгусида илм-фан ва ишлаб чиқариш ўртасидаги узвий алоқаларни янада мустаҳкамлаш зарурлиги қайд этилди.

Мазкур семинар ҳудудда инновацион экотизимни ривожлантириш, илмий ишланмаларни иқтисодий самарага айлантириш ҳамда замонавий тадбиркорлик муҳитини шакллантиришда муҳим аҳамият касб этади.