Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги

Ўзбекистон Республикаси Президентининг, Ўзбекистон Республикаси Олий Мажлиси ва Вазирлар Маҳкамасининг ҳужжатлари, давлат дастурлари ва концепцияларда баён этилган вазифа ва топшириқларда белгиланган вазифаларни бажарилишида илмий ечимларни ишлаб чиқиш учун Илмий фаолиятга оид давлат мақсадли дастурлари доирасида бажариладиган амалий тадқиқотлар танлови эълон қилинмоқда.

Танловга келиб тушган лойиҳалар Ўзбекистон Республикаси Вазирлар Маҳкамасининг “Илмий-тадқиқот ва инновацион фаолиятни ривожлантиришнинг норматив-ҳуқуқий базасини янада такомиллаштириш чора-тадбирлари тўғрисида” 2020 йил 9 мартдаги 133-сон қарорда белгиланган талабларга мувофиқ қуйидаги фан йўналишлари бўйича эълон қилинади:

1. Ахборотлаштириш ва ахборот-коммуникация технологияларини ривожлантириш
2. Филология ва ижтимоий фанлар
3. Ҳуқуқ фанлари
4. Кимё фанлари, кимёвий технологиялар ва нанотехнологиялар
5. Архитектура, қурилиш, дизайн ва шаҳарсозлик
6. Биология ва биотехнология фанлари
7. Педагогика ва психология фанлари
8. Қишлоқ хўжалиги ва атроф-муҳитни муҳофаза қилиш фанлари
9. Техника фанлари
10. Тиббиёт фанлари
11. Ветеринария ва чорвачилик фанлари
12. Иқтисодиёт фанлари

Лойиҳа тақдим қилинганда лойиҳа раҳбари ўз лойиҳаси тадқиқот йўналишидан келиб чиқиб Олий таълим, фан ва инновациялар вазирлиги ҳузуридаги Илмий-техник кенгаш йўналишини танлаши ва шу йўналиш бўйича тақдим қилиши лозим.

Танловга тақдим этиладиган илмий лойиҳалар давлат илмий дастурларининг ягона интеллектуал электрон платформаси (loyiha.ilmiy.uz) орқали 2025 йилнинг 30 сентябрга қадар фақат электрон шаклда қабул қилинади.

 

Танлов шартлари.

1. Танловда илмий-тадқиқотлар ўтказиш учун имконияти ва салоҳияти мавжуд илмий фаолият субъектлари иштирок этиши мумкин.

2. Лойиҳа раҳбари томонидан танловга фақат битта лойиҳа тақдим этилиши мумкин.

3. Амалий тадқиқот лойиҳалари бўйича ижрочи ташкилот Илмий (илмий-техник) кенгаши мажлисининг баёнидан кўчирмада ва бажарилиши режалаштирилган илмий лойиҳа якунида қўлга киритиладиган муҳим илмий натижа (якуний маҳсулот, янги ишланма, технология) қайд этилиши (асослаб берилиши) лозим.

4. Танловга бажариш муддатлари 3 йилгача бўлган лойиҳалар қабул қилинади.

5. Лойиҳани амалга ошириш бўйича илмий жамоанинг ўртача ёши, қоида тариқасида 45 ёшдан ошмаслиги керак. (Илмий жамоанинг ўртача ёши барча ижрочиларнинг ёшини ўртача арифметик қиймати сифатида ҳисобланади).

6. Эълон қилинган мавзуларга тақдим этиладиган илмий лойиҳалар тегишли вазирлик ва идораларнинг қўллаб-қувватлаш хати мавжуд бўлганида қабул қилинади.

7. Илмий лойиҳа маълумотлари Давлат илмий дастурларининг ягона интеллектуал электрон платформаси (loyiha.ilmiy.uz) орқали киритилади ва ижрочи ташкилотнинг масъул раҳбари томонидан тасдиқланади.

8. Танловга тақдим этиладиган илмий лойиҳалар якунида ахборот тизимини ишлаб чиқиш, комплекс фойдаланишга асосланган дастурий маҳсулотлар, веб-платформалар, мобил иловалар яратишга қаратилган бўлса қуйидагилар талаб қилинади:

1. Яратиладиган дастурий маҳсулот учун Адлия вазирлиги ҳузуридаги Интеллектуал мулк агентлигидан ўрнатилган тартибда рўйхатдан ўтказиш ва ЭҲМ учун яратилган дастур гувоҳномасини олиш вазифаси лойиҳа талабномасида акс этиши;
2. Дастурий маҳсулотнинг лойиҳа якунлангандан сўнг, узлуксиз ишлаши ва зарур ҳолларда маълумотларни янгилаб бориш;
3. Лойиҳа талабномасида камида уч йиллик “hosting” ва “domen”(мобил илова бўлса, мобил иловалар дўконига жойлаштириш) харажатларини 5.4-шаклдаги “лойиҳанинг бошқа шу каби харажатлар” бандига киритиш;

 

Эслатма: 

1. Танловга тақдим этилган лойиҳаларнинг ҳар бир босқичда кўриб чиқиш натижалари тўғрисидаги маълумотлар лойиҳа раҳбарларининг Давлат илмий дастурларининг ягона интеллектуал электрон платформасидаги (loyiha.ilmiy.uz) шахсий кабинетларида тақдим этиб борилади.

2. Танловга келиб тушган лойиҳалар Ўзбекистон Республикаси Вазирлар Маҳкамасининг “Илмий-тадқиқот ва инновацион фаолиятни ривожлантиришнинг норматив-ҳуқуқий базасини янада такомиллаштириш чора-тадбирлари тўғрисида” 2020 йил 9 мартдаги 133-сон қарорида белгиланган талабларга мувофиқ экспертизадан ўтказилади.

3. Танловга тақдим этиладиган илмий лойиҳалар лойиҳа раҳбарининг илмий ва инновацион фаолият билан шуғулланувчи жисмоний шахсларни идентификация қилиш тизимида (id.ilmiy.uz) рўйхатдан ўтган шахсий кабинети орқали топширилади. Лойиҳанинг ижрочилари ёки лойиҳа раҳбари бўлмаган шахслар томонидан тақдим этилган, ижрочи ташкилот раҳбарининг масъул ўринбосари томонидан тасдиқланмаган илмий лойиҳалар танловга қабул қилинмайди.

Илмий лойиҳаларни шакллантириш билан боғлиқ масалалар бўйича Инновацион ривожланиш агентлиги масъул ходимлари: +99871 203-32-23 (425, 246, 413).
 

“Science4State – 2025” амалий тадқиқотлар мавзулари
РЎЙХАТИ

1. Ахборотлаштириш ва ахборот-коммуникация технологияларини ривожлантириш фанлари

1.1. Банк тизимидаги пул маблағлари ва крипто-активлар транзакцияларининг статистик таҳлили асосида кибержиноятларни фош этишга кўмаклашувчи дастурий таъминотини яратиш

1.2. Гиёҳванд моддаларни сотиш, тарқатиш соҳасидаги ҳуқуқбузарликларни аниқлаш учун нейрон тармоқлари алгоритмларини ишлаб чиқиш

1.3. «Carding» туридаги жиноятларни фош этиш симуляцион электрон платформасини яратиш.

1.4. Спортда инновацион саралаш технологиясининг дастурий таъминотини яратиш

2. Филология ва ижтимоий фанлар

2.1. Аския санъатининг ноёб намуналарини тўплаш ва мобил иловасини яратиш

2.2. Аския – сўзамоллик санъати билан боғлиқ аудиовизуал асарлар тўпламини яратиш

2.3. Алишер Навоий хамса девонини инглиз тилига таржимаси ва достонларининг параллель корпусга асосланган электрон платформасини яратиш

2.4. «Китоб ат-тавҳид» асарининг Кембриж университетида сақланаётган қўлёзмасини ўрганиш, рақамлаштириш ҳамда факсимиле нусхасини яратиш

2.5. Алишер Навоий асарларидаги фразеологик бирикмаларнинг ўзбек, немис, инглиз, ва рус тилларида мультимедиали мобил илова яратиш

2.6. Энергетика соҳасидаги барча йўналишларни қамраб олган атамалар изоҳли луғати ва электрон платформасини ишлаб чиқиш ва ишга тушириш

2.7. Кадрлар сиёсати ва давлат хизматининг самарадорлигини баҳолаш ва ривожлантиришнинг миллий моделини яратиш

3. Ҳуқуқ фанлари

3.1. Сунъий интеллект технологиялари асосида ёшларнинг ҳуқуқий онги ва ҳуқуқий маданиятини юксалтиришга қаратилган «Huquq maktabi 2.0» платформаси ва мобил иловаларини ишлаб чиқиш

3.2. Тергов органлари фаолиятини замонавий рақамли криминалистик техник воситалар ёрдамида такомиллаштириш истиқболлари

4. Кимё фанлари, кимёвий технологиялар ва нанотехнологиялар

Саноат корхоналаридаги қурилмаларнинг коррозиясини олдини олишда қўлланиладиган янги коррозия ингибиторларини олиш технологиясини ишлаб чиқиш

5. Архитектура, қурилиш, дизайн ва шаҳарсозлик

 Фойдаланиб келинаётган гидротехника иншоотларининг хизмат муддатини узайтириш услубиятини ва технологияларини ишлаб чиқиш

6. Биология ва биотехнология фанлари

6.1. Биолаборатория шароитида энтомофагларни маҳсулдорлигини ва самарадорлигини ошириш учун озиқлантириш тартибларини такомиллаштириш

6.2. Энтомофагларни қадоқлаш ва замонавий техникалар ёрдамида қишлоқ хўжалиги экин майдонларига тарқатиш

6.3. Янги турдаги энтомофагларни (Enkarziya- Encarsia perplexa) кўпайтириш ва сабзавот экинларида оққанот зараркунандасига қарши қўллаш усулини ишлаб чиқиш

7. «Педагогика ва психология фанлари» йўналиши бўйича

7.1. Ультрабинафша нурларидан жисмоний тарбия ва спорт соҳасида фойдаланиш технологияси

7.2. Узлуксиз спорт ҳаракатининг ўзбек моделини яратиш

7.3. Спортчилар ҳаракатларини аналитик таҳлил қилиш асосида техник тайёргарлигини оширувчи инновацион механизмларни ишлаб чиқиш

7.4. Спортчиларнинг ёш хусусиятлари бўйича жисмоний тайёргарлигини ошириш механизмини ишлаб чиқиш

7.5. Жисмоний тарбия ва спорт орқали аҳолининг барча қатламларини соғломлаштиришда сунъий интеллектдан фойдаланиш механизмлари

7.6. Талабаларни оммавий спорт билан мунтазам шуғулланишга жалб этиш учун рақамли технологияларни ишлаб чиқиш

7.7. Спорт курашларида тикланишнинг  технологияларини ишлаб чиқиш

7.8. Соғлом турмуш тарзини ривожлантиришга йўналтирилган соғломлаштириш, фитнес техникаларини ишлаб чиқиш.

7.9. Ўзбек халқ эртакларини аудио спектакллар тўплами

7.10. Оъзбек миллий рақси ва хореография санъати намуналарини рақамлаштириш орқали номоддий маданий меросни ҳимоялаш, сақлаш, ҳужжатлаш ва медиа архив яратиш

7.11. Озодликдан маҳрум этилган шахсларнинг дунёқарашини ижобий шакллантириш, ахлоқан тузатиш ва реабилитация қилиш бўйича услублар мажмуасини ишлаб чиқиш

8. Қишлоқ хўжалиги ва атроф-муҳитни муҳофаза қилиш

8.1. Қорақалпоғистоннинг чўл ва шўрхок тупроқ шароитида дарахт-бута кўчатларини етиштириш ҳамда яшил дарахтзорларни барпо этишнинг инновацион усулларини ишлаб чиқиш

8.2. Лимонни очиқ майдонларда етиштиришга мослашган, совуққа ва қурғоқчиликка чидамли янги навларини яратиш

8.3. Иқлим ўзгариши шароитида альтернатив манбалардаги  сув ресурсларидан ирригация ва энергетика мақсадларида фойдаланиш технологиясини ишлаб чиқиш

8.4. Сурхондарё вилояти шароитида кивини уруғидан ва қаламчасидан кўпайтириш технологиясини ишлаб чиқиш

8.5. Шимолий Фарғона магистраль каналидан ишончли ва самарали фойдаланишнинг гидравлик технологиясини ишлаб чиқиш

8.6. Сунъий интеллект ёрдамида Жанубий Мирзачўл магистраль каналидаги сув ресурсларини самарали ва ишончли бошқариш технологиясини ишлаб чиқиш

8.7. Суғориладиган майдонларда ёпиқ (қувурли) суғориш тизимини жорий этишнинг технологик асослари

8.8. Сув танқислиги шароитида ҳудудлар кесимида қишлоқ хўжалиги экинлари учун мақбул суғориш тартибларини ишлаб чиқиш

8.9. Иссиқхоналарда ўстирилаётган цитрус ўсимликларнинг глобал иқлим ўзгариш шароитларига мос абиотик омилларга чидамли, серҳосил янги нав ва дурагайларини яратиш ҳамда кўргазмали лимонзор ташкил этиш

8.10. Кўк лимон ўсимликларининг Бергамот, Бирс ва Таилайм навларини in-vitro шароитида ниҳолларини кўпайтириш ва  етиштириш агротехнологиясини ишлаб чиқиш

8.11. Иссиқхоналарда ўстирилаётган цитрус ўсимликлардан экологик тоза маҳсулотлар олиш учун ресурс тежамкор етиштириш технологиясини ишлаб чиқиш

8.12. Ўзбекистон тупроқ иқлим шароитига мос сабзи навларини яратиш ҳамда бирламчи уруғчилигини ташкил этиш

8.13. Эртапишар пиёзни «Баҳорой» нави уруғчилигини ташкил этиш

8.14. Республиканинг табиий иқлим шароитларига мос бўлган мойли экинларнинг янги серҳосил навларини яратиш, бирламчи уруғчилигини йўлга қўйиш ҳамда ишлаб чиқаришга жорий этиш

8.15. Қорақалпоғистон Республикаси шароитида стресс омилларга бардошли кам сув талаб қиладиган, дон сифати ва ҳосилдорлиги юқори шоли навларини яратиш

8.16. Оролбўйи ҳудудида табиий озуқа базаси манбалари ва саксовуллар орасида кўпайтирилаётган маҳаллий янтоқ турлари асосида асаларичиликни ривожлантириш учун урчитиш, сақлаш ва боқишнинг инновацион технологиясини ишлаб чиқиш

8.17. Қишлоқ хўжалиги экинлари ҳолатини мунтазам равишда башорат қилиб боришнинг рақамлаштирилган миллий мониторинг тизимини яратиш, учувчисиз учиш қурилмалари ёрдамида экинларни баргидан озиқлантириш, касаллик ва зараркунандаларга қарши курашиш технологияларини ишлаб чиқиш

9. «Техника фанлари» йўналиши бўйича

9.1. «Иссиқлик электр станциялари» АЖ «Сирдарё ИEС» филиалининг қозон қурилмаларида мазут ёқилғисини қўшимча модда қўшиш ва мазут ёқилғиси сарфини камайтириш технологиясини ишлаб чиқиш.

9.2. Суюқлик чиқиндиларини қайта ишлаш технологиясини яратиш

9.3. Тўқимачилик корхоналари чиқиндилари асосида нефть қудуқларини бурғилаш эритмасини ишлаб чиқиш

9.4. Қорамол суякларини қайта ишлаш орқали қамиш қириндили плиталар (ДСП ва ДФП) учун юқори қовушқоқликка эга бўлган елим олиш технологияси

9.5. Шоли поясини қайта ишлаш орқали бетонларга енгиллик ва ғоваксимон хосса берадиган тўлдирувчилар ишлаб чиқариш

9.6. «Ўзметкомбинат» АЖ, «Ўзавтосаноат»АЖ ва Ёғ-мой саноат уюшмаси корхоналарининг қаттиқ ва суюқ чиқиндилари асосида қурилиш материалларини олиш технологиясини ишлаб чиқиш

10. «Тиббиёт фанлари» йўналиши бўйича

10.1. Аллергенлик хусусияти юқори бўлган металларга сенсибилизацияни ташхислаш учун патч-панелини яратиш

10.2. Инсект аллергиясининг ташхислаш ва даволашни амалиётга татбиқ этиш

10.3. Сурункали диарея кузатилган саратон билан касалланган беморларда патоген ичак микрофлорасини ўрганиш ва профилактика ҳамда даволашни оптималлаштириш

10.4. Гематологик ва онкогематологик беморларда тромбофилия учрашиш частотасини ўрганиш, тромботик асоратларнинг олдини олиш алгоритмини ишлаб чиқиш.

10.5. Тиббий маълумотларни таҳлил қилиш ва сунъий интеллект асосида жигар хамда юрак-кон томир тизимининг юқумли бўлмаган касалликларини эрта аниқлаш ва прогноз қилиш учун рақамли платформани яратиш

10.6. Генетик ва ҳужайрали биомаркерлар асосида трансплантациядан кейинги ўткир иммун рад этишни (ТЎИРE) эрта ташхислаш учун ноинвазив комбинацияланган текширув усулларини ишлаб чиқиш

10.7. Ўзбекистонда ўткир лимфобластик лейкемия билан касалланган болаларда кимётерапия асоратларини камайтириш учун даволаш алгоритмини ишлаб чиқиш мақсадида тиопурин метилтрансфераза генининг полиморфизмини, кам учрайдиган генетик мутацияларни ўрганиш

10.8. Ўзбекистонда мия ўсмалари билан касалланган болаларда жарроҳлик, нуртерапия ва кимётерапия асоратларини камайтириш учун даволаш алгоритмини ишлаб чиқиш мақсадида нейрожарроҳлик роботни амалиётга киргизиш

10.9. Торакоабдоминал жарроҳликда кўп аъзолар етишмовчилигининг олдини олиш ва даволашнинг услубий ёндашувларини ишлаб чиқиш

10.10. Қизилўнгач ва ошқозон реконструктив-қайта тиклаш хирургиясида қизилўнгач анастомозлари ва трансплантатларини шакллантиришда торако-лапароскопик технологияларни ишлаб чиқиш

10.11. Жанубий Орол минтақасида яшовчи халқларда асоратланган панкреатитларни даволашнинг кичик инвазив жарроҳлик услубларини ишлаб чиқиш ва амалиётга татбиқ этиш

10.12. Оролбўйи минтақаси шароитида оқсилнинг яхши ва ёмон сифатли касалликлари билан оғриган беморларда қизилўнгач касалликларини миниинвазив жарроҳлик усуллари билан даволашни ривожлантириш

11. “Ветеринария ва чорвачилик” йўналиши бўйича

11.1. Қорақалпоғистон иқлим шароитида иссиққа чидамли Эдилбай ва жайдари қўйлар дурагайларини яратиш, амалиётга жорий қилиш

11.2. Ўзбекистон иссиқ иқлим шароитига чидамли йилқиларнинг янги селекция гуруҳларини яратиш

11.3. Чорва ҳайвонлари ва паррандаларнинг ўта юқумли касалликларини ташхислаш учун янги авлод ПСР — тезкор ташхис қўйиш тўпламларини яратиш.

12. “Иқтисодиёт фанлари” йўналиши бўйича

Яшил иқтисодиёт ва барқарор ривожланиш шароитида ҳудудда саноат корхоналари фаолиятини бошқаришнинг ташкилий-иқтисодий механизмини ишлаб чиқиш