Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги

Ўзбекистон Республикаси Президентининг “Наманган давлат техника университетини ташкил этиш тўғрисида” 2025-йил 24-январдаги ПҚ-23-сон, “Давлат тилини янада ривожлантиришга оид қўшимча чора-тадбирлар тўғрисида” 2025-йил 20-октябрдаги ПҚ-308-сон, “Ўзбекистон давлат спорт академияси фаолиятини ташкил қилиш чора-тадбирлари тўғрисида” 2024-йил 28-майдаги ПҚ-197-сон ҳамда Вазирлар Маҳкамасининг “Сурхондарё ва Сирдарё вилоятларида шамол эрозиясининг салбий таъсирини камайтириш ва экологик вазиятни яхшилаш бўйича чора-тадбирлар дастурини тасдиқлаш тўғрисида” 2026-йил 31-мартдаги 135-сон ва “Ўзбекистон Республикаси Вазирлар Маҳкамаси ҳузуридаги Имом Мотуридий халқаро илмий-тадқиқот марказининг фаолиятини такомиллаштириш чора-тадбирлари тўғрисида” 2025-йил 15-сентябрдаги 583-сон қарорларида баён этилган вазифа ва топшириқларда белгиланган вазифаларни бажарилишида илмий ечимларни ишлаб чиқиш учун Илмий фаолиятга оид давлат мақсадли дастурлари доирасида бажариладиган амалий тадқиқотлар танлови эълон қилинмоқда.

Танловга келиб тушган лойиҳалар Ўзбекистон Республикаси Вазирлар Маҳкамасининг “Илмий-тадқиқот ва инновацион фаолиятни ривожлантиришнинг норматив-ҳуқуқий базасини янада такомиллаштириш чора-тадбирлари тўғрисида” 2020-йил 9-мартдаги 133-сон қарорда белгиланган талабларга мувофиқ қуйидаги фан йўналишлари бўйича эълон қилинади:

Экология, атроф-муҳит муҳофазаси ва иқлим ўзгариши фанлари
Филология ва ижтимоий фанлар
Ҳуқуқ фанлари
Педагогика ва психология фанлари
Қишлоқ хўжалиги фанлари
Тарих ва археология фанлари
Кимё фанлари, кимёвий технологиялар ва нанотехнологиялар

Лойиҳа тақдим қилинганда лойиҳа раҳбари ўз лойиҳаси тадқиқот йўналишидан келиб чиқиб Олий таълим, фан ва инновациялар вазирлиги ҳузуридаги Илмий-техник кенгаш йўналишини танлаши ва шу йўналиш бўйича тақдим қилиши лозим.

Танловга тақдим этиладиган илмий лойиҳалар давлат илмий дастурларининг ягона интеллектуал электрон платформаси (loyiha.ilmiy.uz) орқали 2026-йил 15-майдан 2026-йил 15-июн соат 23:55 га қадар фақат электрон шаклда қабул қилинади.

Танлов шартлари.

1. Танловда илмий-тадқиқотлар ўтказиш учун имконияти ва салоҳияти мавжуд илмий фаолият субъектлари иштирок этиши мумкин.
2. Лойиҳа раҳбари томонидан танловга фақат битта лойиҳа тақдим этилиши мумкин.
3. Амалий тадқиқот лойиҳалари бўйича ижрочи ташкилот Илмий (илмий-техник) кенгаши мажлисининг баёнидан кўчирмада ва бажарилиши режалаштирилган илмий лойиҳа якунида қўлга киритиладиган муҳим илмий натижа (якуний маҳсулот, янги ишланма, технология) қайд этилиши (асослаб берилиши) лозим.
4. Танловга бажариш муддатлари 2 йилгача бўлган лойиҳалар қабул қилинади.
5. Лойиҳани амалга ошириш бўйича илмий жамоанинг ўртача ёши, қоида тариқасида 45 ёшдан ошмаслиги керак. (Илмий жамоанинг ўртача ёши барча ижрочиларнинг ёшини ўртача арифметик қиймати сифатида ҳисобланади).
6. Эълон қилинган мавзуларга тақдим этиладиган илмий лойиҳалар тегишли вазирлик ва идораларнинг қўллаб-қувватлаш хати мавжуд бўлганида қабул қилинади.
7. Илмий лойиҳа маълумотлари Давлат илмий дастурларининг ягона интеллектуал электрон платформаси (loyiha.ilmiy.uz) орқали давлат тилида (лотин алифбосига асосланган ўзбек ёзувида) киритилади ва ижрочи ташкилотнинг масъул раҳбари томонидан тасдиқланади.
8. Танловга тақдим этиладиган илмий лойиҳалар якунида ахборот тизимини ишлаб чиқиш, комплекс фойдаланишга асосланган дастурий маҳсулотлар, веб платформалар, мобил иловалар яратишга қаратилган бўлса қуйидагилар талаб қилинади:

яратиладиган дастурий маҳсулот учун Адлия вазирлиги ҳузуридаги Интеллектуал мулк агентлигидан ўрнатилган тартибда рўйхатдан ўтказиш ва ЭҲМ учун яратилган дастур гувоҳномасини олиш вазифаси лойиҳа талабномасида акс этиши;

дастурий маҳсулотнинг лойиҳа якунлангандан сўнг, узлуксиз ишлаши ва зарур ҳолларда маълумотларни янгилаб бориш;

лойиҳа талабномасида камида уч йиллик “hosting” ва “domen” (мобил илова бўлса, мобил иловалар дўконига жойлаштириш) харажатларини “лойиҳанинг бошқа шу каби харажатлар” бандига киритиш.

Эслатма: Танловга тақдим этилган лойиҳаларнинг ҳар бир босқичда кўриб чиқиш натижалари тўғрисидаги маълумотлар лойиҳа раҳбарларининг Давлат илмий дастурларининг ягона интеллектуал электрон платформасидаги (loyiha.ilmiy.uz) шахсий кабинетларида тақдим этиб борилади.

Танловга тақдим этиладиган лойиҳа талабномалари фақат илмий ва инновацион фаолият билан шуғулланувчи (ScienceID) идентификациясига эга фойдаланувчилар томонидан давлат илмий дастурларининг ягона интеллектуал электрон платформаси (loyiha.ilmiy.uz) орқали қабул қилинади. “ScienceID” дан рўйхатдан ўтиш id.ilmiy.uz тизими орқали амалга оширилади. Лойиҳанинг ижрочилари ёки лойиҳа раҳбари бўлмаган шахслар томонидан тақдим этилган, ижрочи ташкилот раҳбарининг масъул ўринбосари томонидан тасдиқланмаган лойиҳа талабномалари танловга қабул қилинмайди.

Илмий лойиҳаларни шакллантириш билан боғлиқ масалалар бўйича Инновацион ривожланиш агентлиги масъул ходимлари: +99871 203-32-23 (247, 219, 211, 413, 425, 246).

“InnoPro” амалий тадқиқотлар танлови учун мавзулар

РЎЙХАТИ

1 .“Экология ва атроф-муҳитни муҳофаза қилиш фанлари” йўналиши бўйича:

1.1. Афғон шамоли вақтида маҳаллий аҳолини, айниқса, мактаб ва мактабгача таълим ташкилотларида болаларнинг чанг бўронларининг салбий таъсирларидан ҳимоя қилиш мақсадида синф ва машғулот хоналаридаги ҳаво сифатини яхшилаш.

2 .“Филология ва ижтимоий фанлар” йўналиши бўйича:

2.1. Мамлакатимизда истиқомат қилаётган барча миллат ва элатлар вакилларига давлат тилини ўргатишга мўлжалланган ўқув-методик қўлланмалар, кўргазмали материаллар яратиш.

3 .“Ҳуқуқ фанлари” йўналиши бўйича:

3.1. Шахсларнинг давлат чегараси ва чегараолди ҳудудларига кириш, бўлиш ҳамда фаолият юритишга оид мурожаатларни кўриб чиқиш жараёнларини рақамлаштириш;

3.2. Жиноят процессида вояга етмаган жабрланувчиларнинг ҳуқуқларини ҳимоя қилишга қаратилган интерактив электрон платформани яратиш;

3.3. Anticor.Track: ҳуқуқни муҳофаза қилувчи органларда коррупциявий хавф-хатарларни барвақт аниқлаш, олдини олиш ва шаффофликни таъминлашга қаратилган жамоатчилик назоратининг инновацион платформасини яратиш.

4 .“Педагогика ва психология фанлари” йўналиши бўйича:

4.1. Олимпия ва паралимпия спорт турларида юқори натижага эришиш учун виртуал реаллик (VR) ва симуляцион тренинг технологияларини жорий этиш;

4.2. Спортчиларнинг овқатланиш, уйқу ва тикланиш жараёнларини мониторинг қилиш бўйича интеллектуал мобил платформани ишлаб чиқиш;

4.3. Ёш спортчиларни саралашда генетик, психофизиологик ва функционал кўрсаткичларга асосланган комплекс селекция тизимини яратиш;

4.4. Ўзбекистон иқлим шароитида юқори малакали спортчиларнинг иссиқликка мослашуви ва тикланиш технологияларини такомиллаштириш;

4.5. Ўзбекистон спортчиларида сунъий интеллект асосида индивидуал машғулот юкламаларини бошқариш тизимини ишлаб чиқиш.

5 .“Қишлоқ хўжалиги” фанлари йўналиши бўйича:

5.1. Оролбўйи тупроқ-иқлим шароитига мос ўсимликлар ресурсларининг табиий Миллий базасини яратиш;

5.2. Иссиқхоналарда томчилатиб суғориш учун кўчма суғориш сув иншооти конструкцияси ва сунъий интеллектли адаптив бошқарув моделини ишлаб чиқиш.

6 .“Тарих ва археология фанлари” йўналиши бўйича:

6.1. Ёшлар орасида экстремизм ва радикализм профилактикаси ҳамда мутаассиб шахсларни реабилитация қилишнинг илмий-услубий асосларини яратиш;

6.2. Мотуридийликка оид қўлёзма меросни каталоглаштириш ҳамда рақамли реестрни яратиш.

7 .“Кимё фанлари, кимёвий технологиялар ва нанотехнологиялар” йўналиши бўйича:

7.1. Гидроксипропилметилселлюлоза асосида юқори бўкувчан гидрогеллар олиш технологиясини ишлаб чиқиш ва амалиётга қўллаш.