Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги

Ўзбекистон Республикаси Президентининг, Ўзбекистон Республикаси Олий Мажлиси ва Вазирлар Маҳкамасининг ҳужжатлари, давлат дастурлари ва концепцияларда баён этилган вазифа ва топшириқларда белгиланган вазифаларни бажарилишида илмий ечимларни ишлаб чиқиш учун Илмий фаолиятга оид давлат мақсадли дастурлари доирасида бажариладиган амалий тадқиқотлар танлови эълон қилинмоқда.

Танловга келиб тушган лойиҳалар Ўзбекистон Республикаси Вазирлар Маҳкамасининг «Илмий-тадқиқот ва инновацион фаолиятни ривожлантиришнинг норматив-ҳуқуқий базасини янада такомиллаштириш чора-тадбирлари тўғрисида» 2020 йил 9 мартдаги 133-сон қарорида белгиланган талабларга мувофиқ қуйидаги фан йўналишлари бўйича эълон қилинади:

1. Архитектура, қурилиш, дизайн ва шаҳарсозлик фанлари
2. Экология, атроф-муҳит муҳофазаси ва иқлим ўзгариши фанлари
3. Филология ва ижтимоий фанлар
4. Ҳуқуқ фанлари
5. Қишлоқ хўжалиги фанлари
6. Тарих ва археология фанлари
7. Техника фанлари

Лойиҳа тақдим қилинганда лойиҳа раҳбари ўз лойиҳаси тадқиқот йўналишидан келиб чиқиб Олий таълим, фан ва инновациялар вазирлиги ҳузуридаги Илмий-техник кенгаш йўналишини танлаши ва шу йўналиш бўйича тақдим қилиши лозим.

Танловга тақдим этиладиган илмий лойиҳалар давлат илмий дастурларининг ягона интеллектуал электрон платформаси (loyiha.ilmiy.uz) орқали 2026 йил 20 мартдан 2026 йил 20 апрель соат 23:55 га қадар фақат электрон шаклда қабул қилинади.

Танлов шартлари.

1. Танловда илмий-тадқиқотлар ўтказиш учун имконияти ва салоҳияти мавжуд илмий фаолият субъектлари иштирок этиши мумкин.

2. Лойиҳа раҳбари томонидан танловга фақат битта лойиҳа тақдим этилиши мумкин.

3. Амалий тадқиқот лойиҳалари бўйича ижрочи ташкилот Илмий (илмий-техник) кенгаши мажлисининг баёнидан кўчирмада ва бажарилиши режалаштирилган илмий лойиҳа якунида қўлга киритиладиган муҳим илмий натижа (якуний маҳсулот, янги ишланма, технология) қайд этилиши (асослаб берилиши) лозим.

4. Танловга бажариш муддатлари 3 йилгача бўлган лойиҳалар қабул қилинади.

5. Лойиҳани амалга ошириш бўйича илмий жамоанинг ўртача ёши, қоида тариқасида 45 ёшдан ошмаслиги керак. (Илмий жамоанинг ўртача ёши барча ижрочиларнинг ёшини ўртача арифметик қиймати сифатида ҳисобланади).

6. Эълон қилинган мавзуларга тақдим этиладиган илмий лойиҳалар тегишли вазирлик ва идораларнинг қўллаб-қувватлаш хати мавжуд бўлганида қабул қилинади.

7. Илмий лойиҳа маълумотлари Давлат илмий дастурларининг ягона интеллектуал электрон платформаси (loyiha.ilmiy.uz) орқали давлат тилида (лотин алифбосига асосланган ўзбек ёзувида) киритилади ва ижрочи ташкилотнинг масъул раҳбари томонидан тасдиқланади.

8. Танловга тақдим этиладиган илмий лойиҳалар якунида ахборот тизимини ишлаб чиқиш, комплекс фойдаланишга асосланган дастурий маҳсулотлар, веб платформалар, мобил иловалар яратишга қаратилган бўлса қуйидагилар талаб қилинади:

яратиладиган дастурий маҳсулот учун Адлия вазирлиги ҳузуридаги Интеллектуал мулк агентлигидан ўрнатилган тартибда рўйхатдан ўтказиш ва ЭҲМ учун яратилган дастур гувоҳномасини олиш вазифаси лойиҳа талабномасида акс этиши;

дастурий маҳсулотнинг лойиҳа якунлангандан сўнг, узлуксиз ишлаши ва зарур ҳолларда маълумотларни янгилаб бориш;

лойиҳа талабномасида камида уч йиллик «hosting» ва «domen» (мобил илова бўлса, мобил иловалар дўконига жойлаштириш) харажатларини «лойиҳанинг бошқа шу каби харажатлар» бандига киритиш.

Эслатма: Танловга тақдим этилган лойиҳаларнинг ҳар бир босқичда кўриб чиқиш натижалари тўғрисидаги маълумотлар лойиҳа раҳбарларининг Давлат илмий дастурларининг ягона интеллектуал электрон платформасидаги (loyiha.ilmiy.uz) шахсий кабинетларида тақдим этиб борилади.

Танловга тақдим этиладиган лойиҳа талабномалари фақат илмий ва инновацион фаолият билан шуғулланувчи (ScienceID) идентификациясига эга фойдаланувчилар томонидан давлат илмий дастурларининг ягона интеллектуал электрон платформаси (loyiha.ilmiy.uz) орқали  қабул қилинади. «ScienceID» дан рўйхатдан ўтиш id.ilmiy.uz тизими орқали амалга оширилади. Лойиҳанинг ижрочилари ёки лойиҳа раҳбари бўлмаган шахслар томонидан тақдим этилган, ижрочи ташкилот раҳбарининг масъул ўринбосари томонидан тасдиқланмаган лойиҳа талабномалари танловга қабул қилинмайди.

Илмий лойиҳаларни шакллантириш билан боғлиқ масалалар бўйича Инновацион ривожланиш агентлиги масъул ходимлари: +99871 203-32-23 (211, 219, 413, 425, 246).

«Миллий тадқиқот» амалий тадқиқотлар танлови учун мавзулар

РЎЙХАТИ

1. “Архитектура, қурилиш, дизайн ва шаҳарсозлик фанлари” йўналиши бўйича:

1.1. Сейсмик фаол ҳудудларда бино ва иншоотларни лойиҳалаш бўйича миллий норматив ҳужжатларни Европа стандартлари билан интеграциялашнинг илмий-техник асосларини ишлаб чиқиш.

2. “Экология, атроф-муҳит муҳофазаси ва иқлим ўзгариши” йўналиши бўйича:

2.1. ДНК маркер технологиясидан фойдаланиб абиотик ва биотик стресс омилларга чидамли ҳамда дориворлик хусусиятлари юқори бўлган малина (Rubus idaeus L.) нинг юқори ҳосилдор янги F1 дурагайларини яратиш;

2.2. Оролбўйи ҳудудидаги кўллар ва қамишзорлар динамикасини сунъий йўлдош маълумотлари асосида баҳолаш механизмини ишлаб чиқиш;

2.3. Орол денгизи қуриган тубида ўрмон ўсимликларини етиштиришнинг агротехнологиясини такомиллаштириш;

2.4. He-Ne (гелий-неон) лазер қурилмасидан фойдаланиб саксовул (Haloxylonaphyllum) уруғларининг нурланиш орқали униб чиқиш қобилиятини ва кўчатларнинг ўсишини тезлаштириш агротехникасини ишлаб чиқиш;

2.5. Орол денгизи қуриган тубида табиий агроруда асосидаги капсулаларда гранулалаштирилган чўл ўсимликларидан иҳота ўрмон барпо этиш технологиясини жорий этиш.

3. “Филология ва ижтимоий фанлар” йўналиши бўйича:

3.1. «Мен Ўзбекистонда яшаяпман» – ёшларнинг фуқаролик бирдамлиги ва хориждаги ватандошлар билан алоқа лабораториясини яратиш

4. «Ҳуқуқ фанлари» йўналиши бўйича:

4.1. Янги Конституциявий принципларни давлат органлари фаолияти ва ҳуқуқни қўллаш амалиётида фаол қўллаш ҳамда унинг самарадорлигини баҳолаш бўйича комплекс методика ишлаб чиқиш;

4.2. Ўзбекистон Республикаси Конституциясининг 51-моддасида мустаҳкамланган академик эркинлик институтининг конституциявий-ҳуқуқий мазмуни ва амалга ошириш механизмларини ишлаб чиқиш;

4.3. Рақамли муҳитда инсон ҳуқуқлари ва сунъий интеллект этикаси бўйича инновацион таълим технологияларини яратиш.

5. «Қишлоқ хўжалиги» фанлари йўналиши бўйича:

5.1. Ўзбекистоннинг турли ҳудудларида Rosa canina L. ўсимлигида учрайдиган вирусларни аниқлаш, тезкор молекуляр диагностика PSR тест тизимини ишлаб чиқиш ва амалиётга жорий этиш.

6. «Тарих ва археология фанлари» йўналиши бўйича:

6.1. Темурийлар даври манбалари электрон платформасини яратиш.

7. «Техника фанлари» йўналиши бўйича:

7.1. 3U форматидан кичик бўлмаган сунъий йўлдошлар учун  инновацион “Attitude Determination and Control System – ADCS” ни ишлаб чиқиш ҳамда Ер орбитасида синовдан ўтказиш (қайта эълон);

7.2. Маҳаллий иккиламчи хомашёлар (саноат ва қурилиш чиқиндилари) асосида юқори самарали қуруқ қурилиш қоришмаларини ишлаб чиқиш технологиясини яратиш.