Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги

Қорақалпоғистон Республикасидаги иқтидорли ёшларнинг инновацион ғояларини қўллаб-қувватлаш мақсадида 2026 йилда “Бўлажак олим” танлови доирасида илмий ғоялар танловини ташкил этиш шартлари ва танловнинг эълон матни

Танловнинг асосий мақсади: Қорақалпоғистон Республикасидаги инновацион, илмий ҳамда стартап лойиҳаларни қўллаб-қувватлаш, уларнинг илмий изланишлари учун зарур шарт-шароитларни яратиб бериш ҳамда салоҳиятли ёшларни илм-фанга кенг жалб этишдан иборат.

Мазкур танлов Вазирлар Маҳкамасининг 2021 йил 19 апрелдаги “Илмий ва инновацион фаолият билан шуғулланиб келаётган иқтидорли ёшларни қўллаб қувватлаш чора-тадбирлари тўғрисида” 222-сон қарорининг 2-иловаси “Бўлажак олим” танловини ўтказиш тартиби тўғрисидаги низомида белгиланган талабларга мувофиқ ўтказилади.

2026 йилда Қорақалпоғистон Республикасидаги иқтидорли ёшларнинг инновацион ғояларини қўллаб-қувватлаш мақсадида ўтказиладиган “Бўлажак олим” илмий ғоялар танлови бўйича аризалар қабул қилинади:

“Илмий ғоя” - илмий далил, муаммо, фараз, назария каби воқеликни акс эттириш шаклларидан бири бўлиб, фан тараққиётнинг самараси, илмий кашфиётларнинг натижаси сифатида пайдо бўладиган, турли фан соҳаларининг асосий тамойиллари, устувор қоидалари асосида ишлаб чиқилган лойиҳа ҳисобланади.

Танлов иштирокчиларига қўйиладиган талаблар:

- Танлов иштирокчилари Ўзбекистон Республикаси фуқароси бўлиши керак;

- Танлов иштирокчилари ёши, илмий даражаси, унвони, мансаби ва иш жойидан қатъий назар 40 ёшдан ошмаслиги лозим;

- Илмий ғоя муаллифи Қорақалпоғистон Республикасида истиқомат қилиши лозим;

- 1 нафар иштирокчи 1 та лойиҳа билан иштирок этиши лозим.

Танловга топшириладиган илмий ғояларга қўйиладиган талаблар:

- Илмий далил, муаммо, фараз, назария турли фан соҳаларининг асосий тамойиллари, устувор қоидалари асосида ишлаб чиқилган лойиҳа бўлиши лозим;

- Илмий ғоя жамият ва иқтисодиётдаги маълум бир муаммонинг ечимига қаратилган бўлиши лозим;

- Илмий ғояни амалга ошириш учун талаб этиладиган маблағлар аниқ ва асосланган ҳисоб-китоб қилинган бўлиши лозим;

- Илмий ғоянинг аниқ амалга ошириш механизмлари, муддати ва дастлабки натижалари кўрсатилган бўлиши лозим;

- Илмий ғояни амалга оширишнинг энг кўп муддати бир йилгача бўлиши лозим;

- Танловда ғолиб деб топилган илмий ғоялар учун ажратилган маблағлар доирасида илмий ғоя муаллифи ва ижрочиларига ойлик маош (иш ҳақи) кўрсатиш мумкин эмас;

- Топширилган илмий ғояни амалга оширишга сўралган маблағ миқдори базавий ҳисоблаш миқдорининг 400 бараваригача бўлиши зарур;

- Танловда ғолиб деб топилган илмий ғоялар учун ажратилган маблағлар асосида макет ва (ёки) прототип яратиш ҳамда унинг бир бирлик намунасини Инновацион ривожланиш агентлиги биносининг Ёшлар академияси учун ажратилган кўргазмалар зали (шов-роом)да жойлаштириш лозим;

- Тақдим этилган илмий ғоялар танлов талабларига қатий риоя қилинган, илмий ғоя материаллари ишончли ва ҳаққоний, кўчирмачиликка (плагиат) йўл қўйилмаган, белгиланган талаблар асосида шакллантирилган бўлиши лозим;

тақдим этилган лойиҳанинг маълумотлари ҳаққонийлиги ва ишончлилиги, танлов дастурлари вазифаларида белгиланган, кутилаётган натижаларни тўла ва ўз вақтида сифатли бажарилишига лойиҳа раҳбари шахсан жавобгар ҳисобланади.

Танловда иштирок этиш учун аризалар юбориш:

Танлов доирасида аризалар 2026 йилнинг 20 февраль кунидан 2026 йилнинг 30 апрель куни соат 23:59 га қадар қабул қилинади.

Танловга тақдим этиладиган аризалар белгиланган ҳужжат шакллари асосида тўлдирилиб, электрон ҳолда «startup.ilmiy.uz» платформасида топширилиши лозим.

Ариза тўлдириш учун наъмуна.