Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги

Ўзбекистон Республикаси Президентининг, Ўзбекистон Республикаси Олий Мажлиси ва Вазирлар Маҳкамасининг ҳужжатлари, давлат дастурлари ва концепцияларда баён этилган вазифа ва топшириқларда белгиланган вазифаларни бажарилишида илмий ечимларни ишлаб чиқиш учун Илмий фаолиятга оид давлат мақсадли дастурлари доирасида бажариладиган амалий тадқиқотлар танлови эълон қилинмоқда.

Танловга келиб тушган лойиҳалар Ўзбекистон Республикаси Вазирлар Маҳкамасининг “Илмий-тадқиқот ва инновацион фаолиятни ривожлантиришнинг норматив-ҳуқуқий базасини янада такомиллаштириш чора-тадбирлари тўғрисида” 2020 йил 9 мартдаги 133-сон қарорда белгиланган талабларга мувофиқ қуйидаги фан йўналишлари бўйича эълон қилинади:

1. Ахборотлаштириш ва ахборот-коммуникация технологияларини ривожлантириш
2. Филология ва ижтимоий фанлар
3. Ҳуқуқ фанлари
4. Қишлоқ хўжалиги ва атроф-муҳитни муҳофаза қилиш фанлари
5. Техника фанлари
6. Тиббиёт фанлари

Лойиҳа тақдим қилинганда лойиҳа раҳбари ўз лойиҳаси тадқиқот йўналишидан келиб чиқиб Олий таълим, фан ва инновациялар вазирлиги ҳузуридаги Илмий-техник кенгаш йўналишини танлаши ва шу йўналиш бўйича тақдим қилиши лозим.

Танловга тақдим этиладиган илмий лойиҳалар давлат илмий дастурларининг ягона интеллектуал электрон платформаси (loyiha.ilmiy.uz) орқали 2026 йил 2 февралдан 2026 йил 14 март соат 23:55 га қадар фақат электрон шаклда қабул қилинади.
 

Танлов шартлари

1. Танловда илмий-тадқиқотлар ўтказиш учун имконияти ва салоҳияти мавжуд илмий фаолият субъектлари иштирок этиши мумкин.

2. Лойиҳа раҳбари томонидан танловга фақат битта лойиҳа тақдим этилиши мумкин.

3. Амалий тадқиқот лойиҳалари бўйича ижрочи ташкилот Илмий (илмий-техник) кенгаши мажлисининг баёнидан кўчирмада ва бажарилиши режалаштирилган илмий лойиҳа якунида қўлга киритиладиган муҳим илмий натижа (якуний маҳсулот, янги ишланма, технология) қайд этилиши (асослаб берилиши) лозим.

4. Танловга бажариш муддатлари 2 йилгача бўлган лойиҳалар қабул қилинади.

5. Лойиҳани амалга ошириш бўйича илмий жамоанинг ўртача ёши, қоида тариқасида 45 ёшдан ошмаслиги керак. (Илмий жамоанинг ўртача ёши барча ижрочиларнинг ёшини ўртача арифметик қиймати сифатида ҳисобланади).

6. Эълон қилинган мавзуларга тақдим этиладиган илмий лойиҳалар тегишли вазирлик ва идораларнинг қўллаб-қувватлаш хати мавжуд бўлганида қабул қилинади.

7. Илмий лойиҳа маълумотлари Давлат илмий дастурларининг ягона интеллектуал электрон платформаси (loyiha.ilmiy.uz) орқали давлат тилида (лотин алифбосига асосланган ўзбек ёзувида) киритилади ва ижрочи ташкилотнинг масъул раҳбари томонидан тасдиқланади.

8. Танловга тақдим этиладиган илмий лойиҳалар якунида ахборот тизимини ишлаб чиқиш, комплекс фойдаланишга асосланган дастурий маҳсулотлар, веб платформалар, мобил иловалар яратишга қаратилган бўлса қуйидагилар талаб қилинади:

яратиладиган дастурий маҳсулот учун Адлия вазирлиги ҳузуридаги Интеллектуал мулк агентлигидан ўрнатилган тартибда рўйхатдан ўтказиш ва ЭҲМ учун яратилган дастур гувоҳномасини олиш вазифаси лойиҳа талабномасида акс этиши;

дастурий маҳсулотнинг лойиҳа якунлангандан сўнг, узлуксиз ишлаши ва зарур ҳолларда маълумотларни янгилаб бориш;

лойиҳа талабномасида камида уч йиллик “ҳостинг” ва “домен” (мобил илова бўлса, мобил иловалар дўконига жойлаштириш) харажатларини “лойиҳанинг бошқа шу каби харажатлар” бандига киритиш.

Эслатма: Танловга тақдим этилган лойиҳаларнинг ҳар бир босқичда кўриб чиқиш натижалари тўғрисидаги маълумотлар лойиҳа раҳбарларининг Давлат илмий дастурларининг ягона интеллектуал электрон платформасидаги (loyiha.ilmiy.uz) шахсий кабинетларида тақдим этиб борилади.

Танловга тақдим этиладиган лойиҳа талабномалари фақат илмий ва инновацион фаолият билан шуғулланувчи (ScienceID) идентификациясига эга фойдаланувчилар томонидан давлат илмий дастурларининг ягона интеллектуал электрон платформаси (loyiha.ilmiy.uz) орқали  қабул қилинади. “ScienceID” дан рўйхатдан ўтиш id.ilmiy.uz тизими орқали амалга оширилади. Лойиҳанинг ижрочилари ёки лойиҳа раҳбари бўлмаган шахслар томонидан тақдим этилган, ижрочи ташкилот раҳбарининг масъул ўринбосари томонидан тасдиқланмаган лойиҳа талабномалари танловга қабул қилинмайди.

Илмий лойиҳаларни шакллантириш билан боғлиқ масалалар бўйича Инновацион ривожланиш агентлиги масъул ходимлари: +998 71 203-32-23 (211, 219, 413, 425, 246).
 

ScienceUP: 2026 амалий тадқиқот лойиҳалар мавзулари
РЎЙХАТИ

1. “Ахборотлаштириш ва ахборот-коммуникация технологияларини ривожлантириш фанлари” йўналиши бўйича:

1.1. Узлуксиз таълим ва маҳалла тизими учун аҳолининг экологик маданиятини юксалтиришга хизмат қилувчи “Eco-Balance” сунъий интеллектуал мониторинг ва таълим платформасини яратиш.

2. “Филология ва ижтимоий фанлар” йўналиши бўйича:

2.1. Аския ва қизиқчилик санъатида импровизация ва сўз ўйинини ўргатишга қаратилган сунъий интеллект асосидаги таълим платформасини яратиш;

2.2. Аския ва қизиқчилик санъатини замонавий креатив индустрияга мослаштириш ва экспортбоп медиа форматларини яратиш.

2.3. Шерали Жўраев ижодий йўналиши ва фаолияти тарғиботига оид “Шерали Жўраев – миллий мерос” номли мультимедиа маҳсулотлари мажмуасини яратиш

3. “Ҳуқуқ фанлари” йўналиши бўйича:

3.1. Атроф-муҳитни лойиҳалаштириш орқали жиноятчиликни олдини олишнинг миллий стандартлари ва аппарат-дастурий таъминотини яратиш;

3.2. Ҳокимият органлари ваколатларининг суд ҳокимияти, мустақил текширувлар ҳамда жамоатчилик назорати орқали самарали чекланиши йўналишларида мавжуд муаммолар ҳамда ҳуқуқий бўшлиқларни бартараф этиш бўйича миллий методика ишлаб чиқиш.

4. Қишлоқ хўжалиги ва атроф-муҳитни муҳофаза қилиш:

4.1. Токзорларда асосий зараркунанда ва касалликларига қарши микробиологик препаратларни қўллаш ва етиштириладиган маҳсулот сифатини ошириш тизимини ишлаб чиқиш.

5. “Техника фанлари” йўналиши бўйича:

5.1. Ўзбекистонда автомобиль йўлларидаги кўприкли иншоотларнинг лойиҳалаш ва ҳисоблаш усулларини Eurocode (EN) билан уйғунлаштириш бўйича тавсиялар ишлаб чиқиш;

5.2. 3U форматидан кичик бўлмаган сунъий йўлдошлар учун  инновацион “Attitude determination and control system – ADCS”ни ишлаб чиқиш ҳамда Ер орбитасида синовдан ўтказиш.

     5.3. Суюқлик чиқиндиларини қайта ишлаш технологиясини яратиш

     5.4. Куков услубида (Сусков метҳод) ареометрларни калибрлаш қурилмасини яратиш

     5.5. Транспорт воситаларида катта ва кичик ёнилғи баки хажмини аниқлаш датчиги (ДУТ) ни қиёслаш стендини яратиш

     5.6. Путур етказмасдан текшириш ўлчаш воситаларининг метрологик таъминотини ишлаб чиқиш

     5.7. Паст фон нурланишли гамма калибрлаш қурилмасини яратиш

     5.8. Аудиометрларни метрологик текширувдан ўтказиш учун автоматлаштирилган тизимга эга эталон комплексини яратиш

6. “Тиббиёт фанлари” йўналиши бўйича:

6.1. Қорақалпоқ популяцияси аҳолисида асоратланган панкреатитларни янги лабораторик (кенгайтирилган иммунограмма) ташхислаш ва даволашнинг миниинвазив услубларини ишлаб чиқиш.

     7. "Педагогика ва психология фанлари"

     7.1 Ўзбек миллий рақси ва хореография санъати намуналарини рақамлаштириш орқали номоддий маданий меросни ҳимоялаш, сақлаш, ҳужжатлаш ва медиа архив яратиш