Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги

Ўзбекистон Республикаси Президентининг, Ўзбекистон Республикаси Олий Мажлиси ва Вазирлар Маҳкамасининг ҳужжатлари, давлат дастурлари ва консепсияларда баён этилган вазифа ва топшириқлар, Қорақалпоғистон Республикаси ҳудудида олиб борилиши белгиланган вазифаларни бажарилишида илмий ечимларни ишлаб чиқишга қаратилган, шунингдек, амалий лойиҳалар танловининг 113-121-турлари бўйича қайта эълон қилиш мақсадида Илмий фаолиятга оид давлат мақсадли дастурлари доирасида бажариладиган амалий тадқиқотлар танлови эълон қилинмоқда.

Танловга келиб тушган лойиҳалар Ўзбекистон Республикаси Вазирлар Маҳкамасининг “Илмий-тадқиқот ва инновацион фаолиятни ривожлантиришнинг норматив-ҳуқуқий базасини янада такомиллаштириш чора-тадбирлари тўғрисида” 2020-йил 9-мартдаги 133-сон қарорда белгиланган талабларга мувофиқ қуйидаги фан йўналишлари бўйича эълон қилинади:

1. Архитектура, қурилиш, дизайн ва шаҳарсозлик фанлари

2. Ахборотлаштириш ва ахборот-коммуникация технологияларини ривожлантириш

3. Филология ва ижтимоий фанлари

4. Педагогика ва психология фанлари

5. Қишлоқ хўжалиги ва атроф-муҳитни муҳофаза қилиш фанлари

6. Техника фанлари

7. Тиббиёт фанлари

8. Экология ва атроф-муҳитни муҳофаза қилиш фанлари

Лойиҳа тақдим қилинганда лойиҳа раҳбари ўз лойиҳаси тадқиқот йўналишидан келиб чиқиб Олий таълим, фан ва инновациялар вазирлиги ҳузуридаги Илмий-техник кенгаш йўналишини танлаши ва шу йўналиш бўйича тақдим қилиши лозим.

Танловга тақдим этиладиган илмий лойиҳалар давлат илмий дастурларининг ягона интеллектуал электрон платформаси (loyiha.ilmiy.uz) орқали 2026-йил 9-январдан 2026-йил 9-феврал соат 23:55 га қадар фақат электрон шаклда қабул қилинади.

Танлов шартлари.

1. Танловда илмий-тадқиқотлар ўтказиш учун имконияти ва салоҳияти мавжуд илмий фаолият субектлари иштирок этиши мумкин.

2. Лойиҳа раҳбари томонидан танловга фақат битта лойиҳа тақдим этилиши мумкин.

3. Амалий тадқиқот лойиҳалари бўйича ижрочи ташкилот Илмий (илмий-техник) кенгаши мажлисининг баёнидан кўчирмада ва бажарилиши режалаштирилган илмий лойиҳа якунида қўлга киритиладиган муҳим илмий натижа (якуний маҳсулот, янги ишланма, технология) қайд этилиши (асослаб берилиши) лозим.

4. Танловга бажариш муддати 3 йилгача бўлган лойиҳалар қабул қилинади.

5. Лойиҳани амалга ошириш бўйича илмий жамоанинг ўртача ёши, қоида тариқасида 45 ёшдан ошмаслиги керак. (Илмий жамоанинг ўртача ёши барча ижрочиларнинг ёшини ўртача арифметик қиймати сифатида ҳисобланади).

6. Эълон қилинган мавзуларга тақдим этиладиган илмий лойиҳалар тегишли вазирлик ва идораларнинг қўллаб-қувватлаш хати мавжуд бўлганида қабул қилинади.

7. Илмий лойиҳа маълумотлари Давлат илмий дастурларининг ягона интеллектуал электрон платформаси (loyiha.ilmiy.uz) орқали давлат тилида (лотин алифбосига асосланган ўзбек ёзувида) киритилади ва ижрочи ташкилотнинг масъул раҳбари томонидан тасдиқланади.

8. Танловга тақдим этиладиган илмий лойиҳалар якунида ахборот тизимини ишлаб чиқиш, комплекс фойдаланишга асосланган дастурий маҳсулотлар, веб платформалар, мобил иловалар яратишга қаратилган бўлса қуйидагилар талаб қилинади:

a)   яратиладиган дастурий маҳсулот учун Адлия вазирлиги ҳузуридаги Интеллектуал мулк агентлигидан ўрнатилган тартибда рўйхатдан ўтказиш ва ЭҲМ учун яратилган дастур гувоҳномасини олиш вазифаси лойиҳа талабномасида акс этиши;

b)  дастурий маҳсулотнинг лойиҳа якунлангандан сўнг, узлюксиз ишлаши ва зарур ҳолларда маълумотларни янгилаб бориш;

c)   лойиҳа талабномасида камида уч йиллик “ҳостинг” ва “домен” (мобил илова бўлса, мобил иловалар дўконига жойлаштириш) харажатларини “лойиҳанинг бошқа шу каби харажатлар” бандига киритиш.

Эслатма: Танловга тақдим этилган лойиҳаларнинг ҳар бир босқичда кўриб чиқиш натижалари тўғрисидаги маълумотлар лойиҳа раҳбарларининг Давлат илмий дастурларининг ягона интеллектуал электрон платформасидаги (лойиҳа.илмий.уз) шахсий кабинетларида тақдим этиб борилади.

Танловга тақдим этиладиган лойиҳа талабномалари фақат илмий ва инновацион фаолият билан шуғулланувчи (ScienceID) идентификациясига эга фойдаланувчилар томонидан давлат илмий дастурларининг ягона интеллектуал электрон платформаси (loyiha.ilmiy.uz) орқали  қабул қилинади. “ScienceID” дан рўйхатдан ўтиш id.ilmiy.uz тизими орқали амалга оширилади. Лойиҳанинг ижрочилари ёки лойиҳа раҳбари бўлмаган шахслар томонидан тақдим этилган, ижрочи ташкилот раҳбарининг масъул ўринбосари томонидан тасдиқланмаган лойиҳа талабномалари танловга қабул қилинмайди.

Илмий лойиҳаларни шакллантириш билан боғлиқ масалалар бўйича Инновацион ривожланиш агентлиги масъул ходимлари: +99871 203-32-23 (211, 219, 413, 425, 246).

“Science4State – 2026” танлови мавзулари РЎЙХАТИ

1. “Архитектура, қурилиш, дизайн ва шаҳарсозлик фанлари” йўналиши бўйича:

1.1. Сув омбори грунтли тўғонларида нотурғун филтрацияни ва сейсмик кучларни тўғон юқори қиялиги турғунлигига таъсирини аниқлаш ва уни турғунлигини таъминловчи технологияни ишлаб чиқиш (қайта эълон)

2. “Ахборотлаштириш ва ахборот-коммуникация технологияларини ривожлантириш” йўналиши бўйича:

2.1. Объектни аутентификация қилиш протоколларини яратиш (қайта эълон)

3. “Филология ва ижтимоий фанлар” йўналиши бўйича:

3.1. Чекка ҳудудларда истиқомат қилувчи ёлғиз кексалар ва ёлғиз ногиронлиги бўлган шахсларни ижтимоий хизматлар билан қамраб олишнинг алтернатив ёндашувларини ишлаб чиқиш (қайта эълон)

3.2. Имом Доримийнинг “Сулосиёти фил ҳадис” асарини ўзбек тилига илмий-изоҳли таржима қилиш ва мобил иловасини ишлаб чиқиш (қайта эълон)

4. “Педагогика ва психология фанлари” йўналиши бўйича:

4.1. Замонавий таҳдидлар шароитида вояга етмаганлар жиноятчилигини олдини олиш ва хавфсизлигини таъминлашнинг инновацион моделларини ишлаб чиқиш

4.2. Криптотаҳлил фани бўйича электрон ўқув қўлланма яратиш (қайта эълон)

5. “Қишлоқ хўжалиги ва атроф-муҳитни муҳофаза қилиш фанлари” йўналиши бўйича:

5.1. Қорақалпоғистон Республикасида саноат чиқиндилари асосида олинган композицион қўшимчалар ёрдамида Оролбўйи тупроқларининг унумдорлигини ошириш

5.2. Тупроқдаги тузни кристаллаштириб, кўчмас қатламга айлантириш орқали чанг кўтарилишини камайтириш технологиясини ишлаб чиқиш

5.3. Хорижий ғўза навларидаги кўсак қурти (Bt) ва (Gt) глифоатга бардошли генларни маҳаллий навларга ўтказиш орқали республиканинг турли тупроқ-иқлим шароитида етиштиришга мос тезпишар, тола чиқими ва сифати юқори навларини яратиш ҳамда уруғчилигини ташкил этиш

5.4. “Шинжон” тажрибаси (76х10 см қўшқатор схемасида, плёнка остида, 220-240 минг/га кўчат сони) асосида интенсив агротехнологияларни қўллаган ҳолда пахта етиштириш бўйича илмий асосланган агротехнология ишлаб чиқиш

5.5. Маҳаллий ва хорижий ғўза навларининг турли тупроқ-иқлим шароитларида “Шинжон” тажрибаси асосида етиштиришда этефон таркибли препаратларни қўллаш ва дефолиация (десикация) ишларининг амалга оширишнинг ҳосилдорлик, тола ва чигит сифати, мойдорлигига таъсирини аниқлаш ҳамда мақбул меъёр ва муддатларини ишлаб чиқиш

5.6. Плазма технологиялари асосида ғўзанинг биотик ва абиотик омилларга бардошлилигини ошириш орқали пахта ҳосилдорлигини ошириш ва агротехнологиясини ишлаб чиқиш

5.7. Интенсив усулда етиштириладиган пахта майдонларида дронлар ёрдамида агротехник тадбирларни амалга ошириш бўйича илмий асосланган таҳлилий материаллар, хулоса ва тавсиялар ишлаб чиқиш

5.8. Турли тупроқ-иқлим ҳудудлари учун мос, ҳосилдорлиги юқори ва истеъмол сифати яхшиланган маҳаллий картошка Solanum tubero’sum навларини яратиш ва уларнинг давлат нав синовини ўтказиш

5.9. Тупроқ шўрланишига қарши курашишнинг интеграциялашган агротехнологиясини ишлаб чиқиш

6.  “Техника фанлари” йўналиши бўйича:

6.1. Радон мониторинг назорати ва радон ўлчаш воситаларини калибрлаш учун ҳаводаги радон фаоллиги бирлиги миллий эталонини яратиш (қайта эълон)

6.2. Ядровий реакторлар учун юқори хромли қотишмаларни соф тозаликда эритиш ва прокатлаб олиш технологиясини ишлаб чиқиш

7. “Тиббиёт фанлари” йўналиши бўйича:

7.1. Ирсий ва кам учрайдиган орттирилган нефропатиялар ҳамда мураккаб ўсмаларни аниқ верификация қилишнинг инновацион биомаркерлари ва молекуляр-диагностик ёндашувларини ишлаб чиқиш (қайта эълон)

7.2. Оксиметалон, метандиенон, дегидрохлорметилтестостероннинг суд-кимё тезкор текширув услублари ишлаб чиқиш (қайта эълон)

7.3. Гиёҳванд моддалар истеъмолини ўсмирлик ёшида бошлаган шахсларда синтетик психостимуляторларга асоратланган қарамлик терапиясини оптималлаштириш

7.4. Жигарга хос ва васкуло-фиброген омиллар ўртасидаги муносабатларни ўрганиш нуқтайи назаридан болаларда сурункали HBV-инфекциясининг жадаллашув патогенези ва янги  диагностик стратегияларини ишлаб чиқиш (қайта эълон)

8. “ Экология ва атроф-муҳитни муҳофаза қилиш фанлари” йўналиши бўйича:

8.1. Тошкент шаҳрида шамол тезлиги кучайтириш ва қурилиш секторида вентур ҳамда конверген аеродинамик усуллар асосида ҳаво алмашинувини яхшилаш