Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги

Танловнинг асосий мақсади:

Ўзбекистон Республикасидаги иқтидорли ва истеъдодли ёшларнинг инновацион фаолияти натижалари ва ташаббусларини давлат томонидан қўллаб-қувватлаш, ёшларнинг экология йўналишидаги инновацион лойиҳаларини рағбатлантириш учун зарур шарт-шароитларни яратиб бериш, атроф-муҳитни муҳофаза қилиш бўйича ижодий, инновацион ечимларни ишлаб чиқишдан иборат.

Мазкур танлов Вазирлар Маҳкамасининг 2021 йил 19 апрелдаги “Илмий ва инновацион фаолият билан шуғулланиб келаётган иқтидорли ёшларни қўллаб қувватлаш чора-тадбирлари тўғрисида” 222-сон қарорининг 2-иловаси белгиланган “Стартап лойиҳаларни шакллантириш ва уларни кўриб чиқиб, танлаб олиш тартиби”га мувофиқ ўтказилади.

Танлов иштирокчиларига қўйиладиган талаблар:

-Танлов иштирокчилари Ўзбекистон Республикаси фуқароси бўлиши керак;

-Танлов иштирокчилари ёши, илмий даражаси, унвони, мансаби ва иш жойидан қатъий назар 40 ёшдан ошмаслиги лозим;

-1 нафар иштирокчи 1 та лойиҳа билан иштирок этиши лозим.

Танловга топшириладиган стартап лойиҳаларга қўйиладиган талаблар:

-Стартап лойиҳа фақатгина экология соҳасига тегишли бўлиши;

-Стартап лойиҳа анъанавий бизнес турларидан илмий янгилиги ёки инновацион элементига асосан фарқли бўлиши;

-Стартап лойиҳанинг жамият ва иқтисодиётдаги маълум бир муаммонинг ечимига қаратилган бўлиши;

-Стартап лойиҳани амалга ошириш учун талаб этиладиган маблағлар аниқ кўрсатилиши ва асослантирилиши;

-Стартап лойиҳанинг аниқ амалга ошириш механизмлари, муддати ва дастлабки натижалари кўрсатилган бўлиши;

-Стартап лойиҳани амалга оширишга сўралган маблағ миқдори базавий ҳисоблаш миқдорининг 3000 баробаригача бўлиши;

-Тақдим этилган стартап лойиҳалар танлов талабларига қатъий риоя қилинган, стартап лойиҳа материаллари ишончли ва ҳаққоний, кўчирмачиликка (плагиат) йўл қўйилмаган, белгиланган талаблар асосида шакллантирилган бўлиши;

-Стартап лойиҳаларни амалга оширишнинг энг кўп муддати 12 ойдан ошмаслиги;

-Тақдим этилган стартап лойиҳанинг маълумотлари ҳаққонийлиги ва ишончлилиги, танлов дастурлари вазифаларида белгиланган, кутилаётган натижаларни тўла ва ўз вақтида сифатли бажарилишига стартап лойиҳа муаллифлари шахсан жавобгар ҳисобланади.

Танловда иштирок этиш учун аризалар юбориш:

Танлов доирасида аризалар 2025 йилнинг 9 декабрь кунидан 25 декабрь куни соат 23:59 га қадар (25 декабрь куни ҳам қабул қилинади) қабул қилинади.

Танловга тақдим этиладиган аризалар белгиланган ҳужжат шакллари асосида тўлдирилиб, электрон шаклда «startup.ilmiy.uz» платформаси орқали топширилиши лозим.

Тақдим этилган ҳужжатлар “Бўлажак олим” танлови талабларига мос равишда тўлиқ тақдим этилганлиги ва расмийлаштирилганлигини, маълумотларнинг ҳаққонийлиги ва ишончлилиги, танлов дастурлари вазифаларида белгиланган, кутилаётган натижаларни тўла ва ўз вақтида сифатли бажарилишига ариза муаллифлари шахсан жавобгар ҳисобланади