«8 март — Халқаро хотин-қизлар куни» муносабати билан Қорақалпоғистон Республикаси Ички ишлар вазирлигида байрам тадбири бўлиб ўтди
2025-03-09 11:15:00 / Янгиликлар
Халқимиз аёлларни уйғониш ва яшариш фасли бўлган баҳорга қиёслайди. «8 март — Халқаро хотин-қизлар куни» байрамининг ҳам ушбу мавсумнинг илк кунларида нишонланишида ҳам ана шундай ҳикмат мужассам, десак адашмаймиз.
Бугунги кунда хотин-қизларимиз халқ хўжалигининг деярли барча соҳаларида самарали хизмат қилмоқда. Ҳатто улар эл тинчлиги йўлида ҳам ўз фаоллиги билан кўзга ташланмоқда. 8 март Халқаро хотин-қизлар куни муносабати билан Қорақалпоғистон Республикаси Ички ишлар вазирлигида байрам тадбири ўтказилди.
Унда Қорақалпоғистон Республикаси Ички ишлар вазири сўзга чиқиб, йиғилган хотин-қизларни байрам билан табриклади. Таъкидланганидек, мамлакатимизда хотин-қизлар учун кўплаб имкониятлар яратиб берилган, улар қайси соҳада бўлмасин ўзларининг меҳнатсеварлиги, талабчанлиги туфайли эркаклар билан тенг қадам ташлаб хизмат қилиб келмоқда.
Тантанали тадбирда Ўзбекистон Республикаси Ички ишлар вазирларининг махсус буйруқлари билан бир гуруҳ хотин-қизларга кўкрак нишонлари, махсус унвонлар, эсдалик совғалари топширилди. Шу билан бирга вазирлик тизимида хизмат қилаётган хотин-қизлар ўртасида ўтказилган спорт мусобақалари ғолиблари, таълим муассасалари ўқитувчилари ҳам муносиб тақдирланди.
Байрам кечаси вазирликнинг Орол юлдузлари ансамблининг қизиқарли саҳна кўринишлари, маданият ва санъат ходимларининг концерт дастури билан давом этди.
Қорақалпоғистон Республикаси ИИВ Ахборот хизмати