Андижон вилояти судида меҳнат қонунчилиги нормаларини суд амалиётида қўллаш, меҳнат низоларига сабаб бўлаётган ҳолатларнинг олдини олиш масалалари юзасидан семинар ташкил этилди
2025-03-02 09:00:00 / Янгиликлар
Тадбирда Андижон вилояти ИИБ Маънавий-маърифий ишлар ва кадрлар билан таъминлаш хизмати,бошқарма Юридик таъминлаш гуруҳи ҳамда бошқа бир қатор соҳавий хизматлардан ходимлар иштирок этишди.
Семинарда вилоят судининг фуқаролик ишлари бўйича судьяси Акмал Алижонов ҳамда фуқаролик ишлари бўйича Андижон туманлараро суди судьяси Шерзод Араббоев суд амалиёти таҳлили билан боғлиқ маълумотларни тақдим этди.
Қайд этилишича, кейинги пайтларда фуқаролик ишлари бўйича судларда меҳнат низолари билан боғлиқ ишларнинг салмоғи ортиб бормоқда.
Жумладан, биргина 2024 йилнинг ўзида фуқаролик ишлари бўйича Андижон туманлараро суди томонидан бевосита ишга тиклаш билан боғлиқ 115 та, иш ҳақи ундиришга доир 45 та, ишга қабул қилишни ғайриқонуний равишда рад этганлик ҳолати юзасидан 1 та ҳамда бошқа меҳнат низоларига оид 29 та фуқаролик иши кўриб чиқилган.
Мазкур низоларнинг 84 таси қаноатлантирилиб, даъвогарларга иш ҳақи учун 3 миллиард 322 миллион сўмдан зиёд маблағлар ундириб берилган.
Шунингдек, меҳнат шартномасининг бекор қилиниши ортидан ходимнинг маънавий зарар ундириш билан билан боғлиқ талаблари бўйича 282 миллион сўмлик маблағлар ундириш юзасидан қарорлар қабул қилинган.
Семинарда меҳнат низолари келиб чиқишига сабаб бўлаётган ҳолатлар бўйича сўз юритилди.
Айни турдаги даъволар бўйича судларга мурожаат этиш муддатлари, меҳнат ҳуқуқларини ҳимоя қилишнинг асосий усуллари, бу борадаги қонунчилик нормаларини тўғри қўллаш каби қатор масалалар юзасидан фикр алмашилди ҳамда иштирокчиларни қизиқтирган саволларга жавоб берилди.
Андижон вилояти ИИБ Ахборот хизмати