Ҳудудларда. «Яшил» мақомини йўқотмайди
2025-03-02 07:55:00 / Янгиликлар
Пахтакор тумани ИИБ ЖХХ ҲПБ профилактика инспектори, катта лейтенант Тўлқин Омонқулов аёлнинг икки оғиз сўзидан масала моҳиятини тушунди. Бундан икки ҳафта илгари безорилик қилгани учун Б.Д. жавобгарликка тортилганди. Эркак маъмурий қамоқ жазосини ўтаб, уйига қайтгач, унинг устидан шикоят ёзган қўшнисидан қасд олишга чоғланган кўринади.
Қўшнилар жанжаллашаётган манзилга етиб борган профилактика инспектори келишмовчиликка барҳам бериш чораларини кўра бошлади. Аммо спиртли ичимлик таъсирида бўлган Б.Д. қонун ҳимоячисининг талабларига бўйсунмади. Шу боис катта лейтенант унинг қўлларига кишан тақиб, автоуловига чиқарди. Воқеа суд томонидан безорига 7 суткалик маъмурий қамоқ жазоси тайинланиши билан якун топди.
Ора-сира шунга ўхшаш ҳуқуқбузарликлар содир этилишини айтмаса, «Дилором» маҳалласи тинч жой. Жумладан, маҳалла ўтган йили «яшил» мақомини йўқотмади, жорий йилда ҳам ҳудудда жиноят содир этилмаган. Табиийки, мазкур натижа маҳалла еттилиги, хусусан, катта лейтенант Тўлқин Омонқуловнинг саъй-ҳаракатлари самарасидир.
Чунончи, у жиноятлар содир этилишининг олдини олиш мақсадида маъмурий назорат остидаги 3 нафар, жазони очиқда ўтаётган 5 нафар, ички ишлар органларида ҳисобда турадиган 20 нафар, муқаддам судланган 46 нафар шахс билан доимий равишда профилактик тадбирларни амалга оширади. Айни мақсадда жорий йилнинг ўтган даврида 32 та маъмурий баённома расмийлаштирди, ичкиликка ружу қўйган 2 кишининг 6 ой муддатга мажбурий даволанишга ётқизилишини таъминлади.
Қолаверса, ўтган йили маҳалла еттилиги 173 кишини ишга жойлаштирди, 7 нафар ёшга 30 йил муддатга 1 гектардан ер ажратилди. 15 нафар аёл субсидия асосида тикув машинаси билан таъминланди. Бу йил мазкур йўналишдаги ишларни янада кучайтириш режалаштирилган. Қолаверса, маҳалла фаоллари ҳамда илғор ёшлардан тузилган 2 та гуруҳ профилактика инспекторига тунги хизматни бажаришида кўмак бераётир.
Айтганча, февраль ойида кўчаларнинг кириш ва чиқиш жойларига 12 та замонавий кузатув камераси ўрнатилиб, бундай қурилмалар сони 25 тага етказилди. Шунингдек, 31 та ёриткич ўрнатилди. Хуллас, «Дилором» маҳалласида жиноятчиликни жиловламоқ учун ҳамма имкониятлар ишга солинаётир.
Алижон АБДУСАТТОРОВ, ўз мухбиримиз.
Жиззах вилояти.