“Криминологиянинг долзарб масалалари: Вояга етмаганлар ва ёшлар жиноятчилиги ҳамда кибермакон” мавзусида республика илмий-амалий конференцияси ўтказилди
2024-12-26 20:40:00 / Янгиликлар
Ўзбекистон Республикаси Криминология тадқиқот институти томонидан жорий йилнинг 24 октябрь куни ИИВ Академиясида 10 дан ортиқ миллий илмий ва таълим ташкилотлари, ваколатли давлат органлари вакиллари иштирокида конференция ўтказилди.
Конференцияда бевосита Ўзбекистон Республикаси Ёшлар ишлари агентлиги, Ахборот-коммуникация технологиялари ва алоқа ҳарбий институти, Тошкент давлат юридик университети, ИИВ Малака ошириш институти, ИИВ Эксперт криминалистика бош маркази, ИИВ Киберхавфсизлик маркази, ИИВ Ҳуқуқбузарликлар профилактикаси хизмати, Тошкент шаҳар ИИББ ҳузуридаги Ахборот технологиялари билан боғлиқ жиноятларни тергов қилиш бўлими раҳбарлари ҳамда малакали мутахассислари иштирок этдилар.
Йиғилишни Криминология тадқиқот институти бошлиғи ўринбосари, подполковник Ф.Базаров кириш сўзи билан бошлаб, бугун шиддат билан ривожланиб бораётган замонда ҳар қандай турдаги жиноятларга, айниқса ёшлар ва вояга етмаганлар томонидан содир этилаётган жиноятларни олдини олишда ҳамжиҳатликдаги саъй-ҳаракатларсиз кўзланган мақсадга эришишнинг имкони йўқлиги, замонавий таҳдидлар ва хавф-хатарлар юзасидан доимий илмий мулоқот ўрнатиш, уларга қарши курашишда энг самарали усуллар бўйича ўзаро тажриба алмашиш ҳар қачонгидан ҳам муҳимлигини таъкидлади.
Шунингдек, ИИВ Академияси бошлиғи ўринбосари, полковник Р.Нигматов ҳам ҳозирги глобаллашув жараёнлари, техника ва технологияларнинг кун сайин такомиллашуви, миграция ҳодисасининг чегара билмас ҳаракатланиши ўзининг ижобий жиҳатлари билан бирга, салбий томонларини ҳам намоён этаётганлигини, “Оммавий маданият”, трансмиллий жиноятчилик, Интернет тармоқларида тарқатилаётган турли хил менталитетимизга хос бўлмаган намойиш ва чақириқлар ёшлар орасида жиноятчиликнинг ортиб боришига сабаб бўлаётганлигини маълум қилди.
Йиғилишда бевосита маъруза қилган криминолог олимлар, етук малакали экспертлар томонидан вояга етмаганлар ва ёшлар жиноятчилигини жиловлаш, кибержиноятларни олдини олиш ҳамда уларга қарши манзилли
ва мақсадли курашиш ҳар қачонгидан ҳам муҳимлиги, мазкур йўналишдаги жиноятчилик тенденцияларини таҳлил ва прогноз қилиш, жиноятчилик омилларига илмий хулоса бериш, ҳуқуқ-тартибот идоралари соҳасида мақсадли илмий тадқиқотларни олиб бориш амалиёти тизимлиги йўлга қўйиш таъкидланди.
Конференция якунида маърузачилар томонидан илгари сурилган илмий асослантирилган таклиф ва тавсиялар келгусида илм-фанни ривожлантиришга, бугунги кунда давлат сиёсати даражасига кўтарилган вояга етмаганлар ва ёшлар жиноятчилигининг олдини олишга ҳамда оммавий ва трансмиллий жиноятларга қарши курашиш ва глобал жамоат хавфсизлигини таъминлашга хизмат қилиши эътироф этилди.