Наманган вилоятида «Янги йил» байрамида хавфсизликни таъминлаш бўйича тадбирлар муҳокама қилиниб, ҳудудий назорат ишлари олиб борилди
2024-12-25 11:05:00 / Янгиликлар
Йиғилиш вилоят ИИБ бошлиғи полковник Шухрат Алиев, ДХХ, Миллий Гвардия, Фавқулодда вазиятлар ва Давлат солиқ бошқармалари бошлиқлари раҳбарлигида ўтказилиб, унда ИИВдан бириктирилган масъул ходим, бошқарма бошлиғи ўринбосарлари, соҳавий хизмат раҳбарлари, ҳамкор ташкилот ва идоралар вакиллари иштирок этишди ҳамда Янги йил байрамига тайёргарлик кўриш ва тадбирларни ўтказишда фуқаролар ҳамда жамоат хавфсизлигини таъминлаш масалалари атрофлича муҳокама қилинди.
Йиғилиш давомида байрам тадбирларини ўтказишда вилоят ҳуқуқни муҳофаза қилувчи органлар ва бошқа мутасадди ташкилотлар ходимларининг ўзаро ҳамкорликда хизмат ташкил этиши, «Янги йил» арчаси ва бошқа оммавий тадбирлар ўтказиладиган жойларда хавфсизлик чораларини кучайтириш ҳамда бошқа масалалар юзасидан масъул раҳбарларга аниқ топшириқлар берилди.
Шундан сўнг Наманган вилояти ИИБ бошлиғи полковник Шухрат Алиев, Миллий гвардия бошқармаси бошлиғи полковник Хамидулла Маматов ва Фавқулодда вазиятлар бошқармаси бошлиғи полковник Бунёд Эгамназаровлар томонидан Наманган шаҳридаги «Бобур» боғи, Наманган ва Тўрақўрғон туманларидаги оммавий тадбирлар ўтказиладиган жойлар ҳамда Янги йил арчаси атрофида кўрилган хавфсизлик чора-тадбирлари, хизматга жалб этилган ходимларнинг фаолияти ҳамда фуқароларга яратилган шарт-шароитлар ўрганилди.
Ўрганишлар якунида «Янги йил» байрами муносабати билан ўтказиладиган тадбирларда шахсий хавфсизликни таъминлаган ҳолда байрамни тинч ва осойишта ўтказилишини таъминлаш ҳамда турли кўнгилсиз ҳодисаларга йўл қўймаслик бўйича масъулларга аниқ топшириқлар берилди.
Наманган вилояти ИИБ Ахборот хизмати