Навоийда вилоят ИИБ бошлиғи Азат Тасбаев ва Миллий гвардия вилоят бошқармаси бошлиғи Баходир Тоировлар Кармана туманидаги ижтимоий объектларнинг қиш мавсумига тайёргарлик ҳолатини ўрганишди
2024-12-24 10:10:00 / Янгиликлар
Мавсумни беталафот ўтказиш, аҳолига электр энергияси, табиий ва суюлтирилган газ, кўмир етказиб бериш ҳамда бунга масъул идора-ташкилотлар ва ижтимоий объектларнинг қиш мавсумига тайёргарлигини кўздан кечириш мақсадида Навоий вилоят ИИБ бошлиғи,полковник Азат Тасбаев раҳбарлигида ўрганишлар олиб борилмоқда.
Жараёнда ишчи гуруҳ томонидан умумтаълим мактаблари, мактабгача таълим муассасалари, соғлиқни сақлаш соҳаси объектлари, кўп қаватли турар жой бинолари ва уларга хизмат кўрсатувчи ширкатлар фаолияти кўздан кечирилди. Дастлаб, Кармана туманидаги кўмир захираси, сўнгра туман ҳудудида жойлашган 27-сонли умумтаълим мактаби ва 16-сонли давлат мактабгача таълим ташкилотининг мавсумга тайёргарлиги, қозонхоналари фаолияти ҳамда биноларнинг иситиш тизими кўздан кечирилди. Аниқланган камчиликларни ўз вақтида бартараф этиш, аҳолини иссиқлик манбаи билан узлуксиз таъминлаш юзасидан масъулларга топшириқлар берилди.
Шундан сўнг, мутасаддилар томонидан тунги хизматга жалб қилинган ходимлар фаолияти ўрганилиб, жиноят ва ҳуқуқбузарликнинг барвақт олдини олиш, фуқароларнинг осойишталиги ва хавфсизлигини таъминлаш борасида амалга оширилаётган ишлар билан танишилди.
Ўрганишлар давом этмоқда.
Навоий вилояти ИИБ Ахборот хизмати