Асосий контентга ўтиш

Тошкент вилояти Ички ишлар бош бошқармаси бошлиғи ҳудудлардаги қиш мавсумига тайёргарлик ҳолатларини ўрганди

2024-12-23 12:35:00 / Янгиликлар

Тошкент вилояти ИИББ бошлиғи, генерал-майор Тоҳир Арипов томонидан Ўрта Чирчиқ тумани «Кучлик» маҳалласида жойлашган захира кўмир базаси, туман аҳолиси учун хизмат кўрсатувчи «Ҳудудгазтаъминот» корхонаси ҳамда Нурафшон шаҳрида электр тармоқлари корхонасининг қиш мавсумига тайёргарлик ишлари ўрганилди.

Жараёнда энергия ресурсларининг барқарорлигини таъминлаш, аҳолига сифатли хизмат кўрсатиш, авария ҳолатларининг олдини олиш бўйича олиб борилаётган ишлар ва техник ускуналарнинг ҳолати кўздан кечирилди.

Ҳудудий ИИБ раҳбарлари ва йўналишлар бўйича масъулларга мавжуд камчиликларни тезда бартараф этиш, аҳоли мурожаатларини ўз вақтида ҳал қилиш, қарздорликларни ундириш ҳамда истеъмолчиларни сифатли ва узлуксиз энергия манбалари билан таъминлаш зарурлиги таъкидланди. Ушбу масалалар бўйича аниқ вазифалар белгилаб берилди.

Шунингдек, тегишли идора вакилларига мазкур корхоналарда хизматни барқарорлигини таъминлаш мақсадида навбатчилик асосида ишлашни ташкил этиш, навбатчи ходимлар учун барча зарур шароитларни яратиш, техник воситалар ва транспорт билан таъминлаш бўйича топшириқлар берилди. Жараёнларнинг ижроси қатъий назоратга олинди.

Мазкур тадбирлардан кўзланган асосий мақсад қиш мавсумида аҳолини энергия ресурслари билан узлуксиз таъминлаш, тегишли ташкилотлар ходимларининг масъулиятини ошириш ҳамда юзага келиши мумкин бўлган муаммоларнинг олдини олишдан иборат. Шу билан бирга, аҳолининг турмуш сифати ва хавфсизлигини яхшилашга қаратилган ушбу саъй-ҳаракатлар қиш мавсумини беташвиш ўтказишга хизмат қилади.

Тошкент вилояти ИИББ Ахборот хизмати

46

Охирги янгиланиш: 2024-12-23 22:22:59

Тошкент вилояти Ички ишлар бош бошқармаси бошлиғи ҳудудлардаги қиш мавсумига тайёргарлик ҳолатларини ўрганди