Мамлакатимизда ёшлар маънавиятини юксалтириш ва уларнинг бўш вақтини мазмунли ташкил этиш бўйича “Беш ташаббус олимпиадаси” доирасида ёшларни жисмоний чиниқтириш, уларнинг спорт соҳасидаги қобилиятини намоён қилишлари учун бир қатор тадбирлар амалга оширилмоқда. Жумладан, Қарши шаҳридаги олимпия ва паралимпия захиралари мактабида “Беш ташаббус олимпиадаси” доирасида олий таълим муассасалари талабалари ўртасида спортнинг волейбол тури бўйича мусобақасининг Республика финал босқичи бўлиб ўтди.

Қизғин ва муросасиз руҳда кечган волейбол мусобақасининг ўғил болалар ўртасидаги баҳсларда 1-ўринни Самарқанд вилоятидаги Ўзбекистон-Финляндия педагогика институти талабалари қўлга киритди. Навбатдаги совринли ўринларни Бухоро давлат университети ва Жиззах давлат педагогика университети талабалари банд этишди.

Қиз болалар ўртасида кечган волейбол ўйинларида Бухоро давлат университети талабалари барча рақибларини доғда қолдириб ғолиблик шоҳсупасидан жой олди. 2-ўринни эса Гулистон давлат университети ва 3-ўринни мезбон жамоа Қарши давлат университетининг волейболчи қизлари қўлга киритди.

Ғолиблар кубок, диплом ва медаллар билан тақдирланди.

Қашқадарё вилояти ИИБ Ахборот хизмати