Сурхондарё вилоятида 13-16 ноябрь кунлари ички ишлар органлари кинология бўлинмалари ходимлари ўртасида кўпкураш мусобақасининг республика босқичи ўтказилди.

Вилоят ИИБ ТВБСО спорт ўйингоҳида мусобақанинг тантанали очилиш маросими бўлиб ўтди.

Шундан сўнг, беллашувларга старт бериш учун хизмат итлари ветеринария кўригидан ўтказилиб, жамоалар аъзоларининг қуръа ташлаш маросими ўтказилди.

Дастлаб, иштирокчилар хизмат итлари билан енгил транспорт воситасида, бино ичида ва багаж ёки қўл юкларда яширилган гиёҳвандлик моддасини қидириб топиш машқи бўйича беллашдилар. Из-қидирув йўналишида ҳам хизмат итларининг из олиш маҳорати синовдан ўтказилди.

Мусобақанинг учинчи кунида иштирокчилар из-қидируви бўйича буюмни танлаш, кийим ҳидидан аниқлаш, транспорт ёки қўл юкларида яширилган қурол-яроқ ёки портловчи моддани қидириб топишдаги маҳоратини намойиш қилишди.

Айниқса, тўсиқларни вақтга енгиб ўтиш машқи анчайин муросасиз кечди.

Иштирокчиларнинг ҳар бир ҳаракати ҳакамлар ҳайъати томонидан баҳолаб борилди.

Беллашувлар ниҳоясига етгач, 16 ноябрь куни вилоят ИИБ ТВБСО спорт ўйингоҳида кўпкураш ўйинларининг тантанали ёпилиш маросими бўлиб ўтди. Унда вилоятлардан келган барча жамоалар саф тортишди.

Ўзбекистон Республикаси ИИВ ЖХД ЖТСХ бошлиғи подполковник О.Шарипов, Сурхондарё вилояти ИИБ бошлиғи полковник Т.Исмаилов ҳамда нафақадаги полковник А.Холиқовлар сўзга чиқиб кинология соҳасидаги янгиликлар ва бугун яратилган шароитлар тўғрисида алоҳида тўхталиб ўтишди.

Шундан сўнг, натижалар эълон қилинди. Унга кўра, умум-жамоа ҳисобида

3-ўрин Тошкент шаҳар ИИББ жамоасига,

2-ўрин Навоий вилояти ИИБ жамоасига,

1-ўрин Сурхондарё вилояти ИИБ жамоасига насиб қилди.

Сурхондарё вилояти ИИБ Ахборот хизмати