1 октябрь куни Миллий Олимпия қўмитасида Ички ишлар вазири, Ўзбекистон волейбол федерацияси раиси Пўлат Бобожонов мамлакатимизда расмий ташриф билан бўлиб турган Халқаро волейбол федерацияси президенти Ари Грасса жаноблари билан учрашуви бўлиб ўтди
2024-10-01 13:10:00 / Янгиликлар
Тадбирда Ўзбекистон Республикаси Спорт вазири Адхам Икромов, Ўзбекистон Миллий Олимпия қўмитаси Бош котиби Ойбек Касимов, шунингдек Ички ишлар вазирининг ўринбосари — Ўзбекистон волейбол федерацияси раисининг биринчи ўринбосари Бекмурод Абдуллаевлар қатнашдилар.
Учрашув жараёнида, кун тартибига мувофиқ, мамлакатимизда волейбол спорти ривожини янги босқичга олиб чиқиш, уни янада оммалаштириш, маҳаллий мутахассислар малакасини ошириш, Ўзбекистонда волейбол бўйича йирик халқаро мусобақаларни ташкил этиш, шунингдек мамлакатимизда Волейбол спорт тури бўйича 19 ёшгача бўлган ёшлар ўртасида (U-19) Жаҳон чемпионатини ўтказиш масалалари муҳокама қилинди.
Дўстона ва конструктив руҳда ўтган учрашувда халқаро ҳамкорликни янада ривожлантириш ҳамда соҳага оид истиқболли вазифалар белгилаб олинди.
Халқаро волейбол федерацияси делегациясининг мамлакатимизга ташрифи дастурига мувофиқ Ички ишлар вазирлигига қарашли “Жар” спорт мажмуасида жаҳон ва олимпиада чемпиони Елизавета Брах томонидан ёш волейболчиларга мастер класс кўрсатилиши ҳамда Ўзбекистон олий лига чемпионатининг финал учрашувида қатнашиши режалаштирилган.