Инсон қадри учун. Кўнгил хотиржамлиги ҳалолликда
2024-09-30 08:05:00 / Янгиликлар
Орамизда билиб-билмай жиноят кўчасига кириб қолганлар ҳам йўқ эмас, албатта. Зеро, адашганларга имкон бериш, кечиримлилик ва уларни яхши маънода қўллаб-қувватлаш бағрикенг халқимизга юқтирилган инсоний фазилатларнинг бир кўринишидир.
— Айни пайтда ҳудудимиз бўйича жами 426 нафар назоратдаги шахс жазо муддатини ўтаб келмоқда, — дейди Оқдарё тумани ИИБ ЖХХ Пробация гуруҳи катта инспектори, капитан Элёр Жабборов. — Шундан 103 нафарини ахлоқ тузатиш ишлари, 7 нафарини шартли ҳукм қилинганлар, 51 нафарини муайян ҳуқуқдан маҳрум қилинганлар, 101 нафарини озодликни чеклаш, 164 нафарни муддатидан илгари шартли озод этилганлар ташкил этади. Бугунги кунга қадар тузалиш йўлига ўтган 113 нафар назоратдаги шахс эса муддатидан илгари шартли равишда озод этилди. Уларнинг жамиятда фаол иштирокини таъминлаш яна қайта жиноят содир этмаслигининг олдини олиш мақсадида керакли профилактик ишлар олиб борилмоқда.
Оқдарё туманида “Ишга марҳамат” меҳнат ярмаркаси, “Тадбиркор ва ёшлар учрашуви” сингари тадбирларда ҳисобда турган, назоратдаги ёшларнинг бандлигини таъминлашга алоҳида эътибор қаратилмоқда. Жумладан, яқин кунларда бўлиб ўтган меҳнат ярмаркасида оталиққа олинган ёшлардан Сирож Раджабов, Феруз Махмудов, Зафар Толибов ва Нурмуҳаммад Самандаровлар ишли бўлди.
- Хато қилмаслик учун ҳар бир қадамни ўйлаб босиш керак экан, — дейди Нурмуҳаммад Самандаров. — Бўлмаса хато қилиб, жабрини инсоннинг ўзи тортаркан. Мен ҳам билиб-билмай жиноят кўчасига кириб қолдим. Ва қилмишимга яраша жазо тайинланди. Айбимга иқрорлик, қилган қилмишга пушаймонликда жазо муддатининг ярмини панжара ортида ўтказдим. Кейин жазоим енгиллаштирилиб, ахлоқ тузатиш ишлари жазоси тайинланди. Бунинг учун ҳукуматимиздан ниҳоятда миннатдорман. Ҳозирда полиз маҳсулотлари етиштириладиган “Ислом Худойқулов” фермер хўжалигида ишлаяпман.
Ҳа, инсон кўнглига ҳалоллик, тўғрилик ва меҳнатсеварлик хотиржамлик бағишлайди. Бугун орамизда кимлардир ўзининг қилган хатоларини англаб етиб, тўғри йўлни танлаб, ҳаётини изига солаётгани яхши ҳолат. Зотан, Нурмуҳаммад сингари қалб амри билан ҳаловатга интилиб, меҳнат қилаётганларнинг ҳар бир амалида туман ИИБ Пробация гуруҳида хизмат олиб бораётган фидойи ходимларнинг ҳамда мутасаддиларнинг муносиб ўрни бор.